БЕСТАЕВ Георгий

Йæ фыццаг къахдзæфтæй йæ амæлæты бонмæ Гиуæрги уыди романтик. Уый дуне уыдта сыгъдæг, æнæхин цæстытæй. Йæ литературон бынтæ бирæ не сты — йæ царды хуыздæр азтæ схардз кодта Руставелийы «Стайы цармдарæг» ирон æвзагмæ раивыныл. Уый уыди стыр сгуыхт — хуымæтæджы нæ райста Мацабелийы номыл Гуырдзыстоны паддзахадон преми.
Бестауты Гиглайы фырт Гиуæрги райгуырди Хуссар Ирыстоны, Годжиты хъæуы, зæхкусæджы хæдзары.
Каст фæци Цхинвалы гуырдзиаг астæуккаг скъола, стæй Тбилисы университеты журналистикæйы факультет. Куыста журнал «Фидиуæджы» редакцийы поэзийы сæргълæууæгæй, стæй та бæрнон секретарæй, чиныгуадзæн «Ирыстон»-ы сæйраг редакторæй.

Йе ’мдзæвгæты фыццаг чиныг «Уадтымыгъ» ра - цыди 1958 азы Цхинвалы. Уый фæстæ ма рауагъта цалдæр поэтикон æмбырдгонды. Йæ уацмыстæ йын æртæ томæй (æмдзæвгæтæ, кадджытæ, тæлмацтæ, литературон-критикон уацтæ, публицистикæ) бацæттæ кодта Нафи, рацыдысты 2003-2004 азты Дзæуджыхъæуы. Гиуæрги стыр курдиаты хицау кæй у, уый бæрæг уыд йæ фыццаг чиныгæй дæр. Куы йæ бакастæн, уæд ын йæ рæнхъытæй бирæтæ æвиппайды мæ зæрдыл бадардтон æмæ мæ абон дæр нæ рох кæнынц. Зæгъæм, мæнæ адон: «Галы фæдты къæвдайы дон сæлы... фæззæг у рæгъæд кæрдойау бур». Йæ уарзон чызджы тыххæй та æрыгон поэт афтæ фыста: «Раскъуынин ын къабайаг цъæх арвæй, скæнин ын Æрфæныфæдæй рон». Бирæ азты дæргъы Цæгаты дæр æмæ Хуссары дæр цы чингуытæ цыд, уыдон бæз-бæз кодтой æнæахадгæ хус ныхæстæй, гомгæрцц лозунгтæй. Фæлæ «Хрущевы тæфсæн дуг» («хрущевская оттепель») куы ралæууыд, уæд литературæйы дæр уд цæуын байдыдта. Æмæ æхсайæм азты фæлтæрæн йе ’взыгъддæр зиууонтæй иу уыди Бестауты Гиуæрги.

«Куы рацæуын æлвæст кардау æз уынджы зæрдæ - хъæлдзæг, ныфсхаст æмæ сæрыстыр», — фыста йæ иу æмдзæвгæйы поэт. Æмæ æцæгæй дæр, цы йе ’ддаг бакаст, цы йæ удыконд, цы йæ поэтикон æхсар, йæ рæстдзинад — æрвызгъæрæй конд нæртон кардау тæмæнтæ калгæйæ баззади нæ зæрдæты. Йæ фыццаг къахдзæфтæй йæ амæлæты бонмæ Гиуæрги уыди романтик. Уый дуне уыдта сыгъдæг, æнæхин цæстытæй. Йæ литературон бынтæ бирæ не сты — йæ царды хуыздæр азтæ схардз кодта Руставелийы «Стайы цармдарæг» ирон æвзагмæ раивыныл. Уый уыди стыр сгуыхт — хуымæтæджы нæ райста Мацабелийы номыл Гуырдзыстоны паддзахадон преми. «Æрвæрттывды цæхæрзынг ис мæ къухы», — афтæ загъта поэт йæ сфæлдыстадон фæндаджы райдайæны. Мæнæ ацы рæнхъытæ та йæ фæстаг чиныгæй ист сты (йæхæдæг æй нал федта: 1978 азы йе ’мгæртты рæнхъытæй фæхъуыди цæрынхъуа - гæй): «Фæндæгтæ, æрвæрттывды уидæгтæ, — уе ’гъуыстаг фыдамондыл хъæцут!»

Поэтæн йæхи фæндæгтæ дæр сты æрвæрттывды уидæгтæ, «кæдæм нæ фæтчы, уырдæм удаист, цымыдисæй тындзынц». (Барæнæбары зæрдыл æрлæууынц Владимир Маяковскииы ныхæстæ дæр: «Поэзия — вся! — езда в незнаемое»).
Æрвæрттывды уидæгтæ» нæм зынынц фидæнæй, цæуынц зæрдæйæ зæрдæмæ, фæлтæрæй фæлтæрмæ...

101
Ма Кæ / Бестаев Георгий. Читает Казбек Лалиев,
БЕСТАЕВ Георгий