ДӔ РУХС ФЫНТӔМ ӔРТӔХДЗЫНӔН ЗӔДАУ...

Уӕларвыл мӕй куы бацахса йӕ ран,
Стъалытӕ куы апырхой рӕдзӕгъдау,
Ӕз фестдзынӕн сызгъӕринбазыр маргъ.
Дӕ рухс фынтӕм ӕртӕхдзынӕн дӕ зӕдау.

Ссардзынӕн ӕмбудӕнӕй дӕ уат.
Мӕ базырӕй ӕз бакӕндзынӕн рудзынг.
Ӕрбаддзынӕн дӕ сынтӕгыл ӕнцад.
Мӕ риуы та мӕ зӕрдӕ артау суддзӕн.

Мӕ цӕстӕнгас нӕ айсдзынӕн дӕуӕй.
Мӕ мондӕгтӕ ӕз сисдзынӕн дӕ хуызӕй.
Йӕ хӕдзармӕ куы фӕцӕйцауа мӕй,
Рӕвдауаг ба ӕз байсдзынӕн дӕ русӕй.

Фыццаг тынтимӕ фесӕфдзынӕн 'васт.
Ды фенхъӕлдзынӕ,ӕз уыдтӕн фӕлурс фын.
Ӕртӕхдзынӕн та райсом афтӕ раст,
Ӕрмӕст изӕры ма бахгӕ дӕ рудзынг...

Автор: Плиева Татьяна