ДЫУУАДÆСТÆНОН

Илаты Темырæн

Ныллæг къæлæтджыныл куы 'рбады

Æвзонг фæндырдзæгъдæг Темыр,

Уæд кадæг бацæуы йæ рады,

Уæд фесты 'гас дуне æмыр.

Æрвиты рагфыдæл фæдонтæм

Фарн æмæ амондыл фæдзæхст.

Фæндыры зæл фæстаджы бонтæм

Зæрдæйы тæгтыл у нывæст.

Цы тыхæй рафтыди дæ сæвзæрд,

Сырдоны хъарæджы фæлдыст...

Мыггагмæ азфыстау фæлæзæрд

Зæлгæ æрвыстæджы фæлыст.

Дыууадæс тæныл 'нусты арфæй

Уый махмæ дард балцы фæцыд,

Цæмæй ызнæт дугæн йæ тарфæй

Дзыллæйыл кала рухсы цъыртт.

Цæмæй Аланыстоны сæрмæ

Зæрин хур циндзæстæй кæса,

Сæрибар стъалыты бæрзæндмæ

Нæртон дзырд кады ном хæсса.

28.01.2015

Автор: Цоколаты Катеринæ

Комментарии

  • tskati91
    10.02.2015 17:07:49

    Бузныг!

  • Жанна
    02.02.2015 15:11:21

    Катеринæ!!!!!! Зæрдæ райы!!!!

  • Zalin777
    17.05.2015 17:24:43

    Тæхуды, дæ цæстытæм бакæс, Дæ хъæлæсмæ байхъус фæлмæн, Дæ хъуыдытæн базон сæ сагъæс, Дæ амондæн рухс фæндаг скæн!!! )))))