«УАРЗОНАДЫ ПИСМО»

Фӕрдгуытӕн, сӕ алы цӕст, ӕвзаргӕ,

Иугӕйдтӕ сӕ, бӕттӕныл быдтон!

Агуырдтон дын, гӕххӕты ӕвзагӕй,

Зӕрдӕбын ныхӕстӕ, ‘нӕхъӕн бон!

 

Ныхӕстӕ мӕ зӕрдӕйӕ фӕистон -

Хур мӕ сӕ стъалытимӕ барстон ...

Иугӕйдтӕ сӕ, гӕххӕтыл, фӕфыстон,

Хуыздӕртӕй, сӕ рӕсугъддӕр, ‘взӕрстон!

 

Хъуыдыты дӕ, таласӕй, рӕвдауын,

Райхӕлтон, фӕлмӕнӕй дын, мӕ уд.

Ныхӕстӕн, сӕ хуыздӕртӕ дын, арын -

Уардитӕн сӕ тӕф ӕмӕ сӕ худт.

 

"Дзургӕ ды – цыхцырӕгау фӕхъазыс …

Дзыккутӕ - уӕззау сты, дӕргъытӕ,

Стъӕлытау - цъӕх цӕстытӕ, мӕ разы,

Лалыхуыз, фӕлмӕн сты дӕ былтӕ ..."

 

Бахауттӕн, дӕ уацары, мӕ бонӕй -

'Хсӕвӕй-бонӕй ӕз дӕумӕ бӕллын!

Уарзын дӕ мӕ хуры хай, мӕ зонӕй,

Ракӕс мӕм - ӕнӕ дӕуӕй мӕлын.

 

Райсомӕй изӕрмӕ ручкӕ хастон,

Зӕрдӕйы, ӕнкъарӕнтӕм, хъуыстон,

Алы ныхас, барӕнтыл, фӕбарстон,

Уарзонадыл, писмо дӕм, фыстон ...

*******

Автор: Чехоев Валерий Владимирович