«ДЗӔУДЖЫХЪӔУ»

Мыдыбындзӕн, быдыры - дидингуытӕй цины хуым

Махӕн та у Дзӕуджыхъӕу - цины ӕмӕ фарны къуым!

Дзӕуджыхъӕу, нӕ Дзӕуджыхъӕу – хуры тынтӕ уалдзыгон,

Уынгты ирон чызджытӕ – дидингытау, ӕрыгон!

 

Хохрӕбыны райдзастӕй, дзындзынайы фӕрдыгау,

Терчы былыл айтынг дӕ фарны горӕт - Дзӕуджыхъӕу!

Хур йӕ къухы, фарнимӕ, дӕу “Фатима” хъарм кӕны,

Урс бӕхыл та Уастырджы - хизы мӕ дӕ хъахъӕны!

 

Фӕсарӕнтӕм ацӕуӕм, алызуызон дард бӕстӕм,

Уарзон горӕт, стӕй дӕумӕ, цингӕнгӕйӕ ӕрбаздӕхӕм!

Ӕз дӕ уынгтӕм, къӕсӕртӕм, хохы сӕрӕй ракӕсин,

Сабидуг мӕ ӕвзонгдзинад кӕд уӕлейӕ ауынин!

 

Фыдӕбӕттӕ, зындзинад дард дӕ уынгтӕй асурин,

Дидингуытӕ - уардитӕ сӕ бынӕтты асадзин!

Галуантӕ диссаджы уарзонадӕй самаин,

Арфӕ ӕмӕ куывдтытӕй сӕ хуыздӕр дын равзарин!

 

Стӕй Хуыцауы дзуарӕй Ирыстонӕн акувин,

Уарзонадӕй, хъалзӕрдӕ, хохы цъуппыл акафин!

Сисин ӕрмытъӕпӕнӕй, Терчы донӕй баназин,

Буц мӕ рӕсугъд горӕтӕй, зонгӕ зарӕг базарин!

 

Иры хъӕуыл разилин мӕ Шалдонмӕ бауаин,

Уым мӕ уарзон - сауӕрфыг, мидбылхудгӕ ауынин!

Даргъ дзыккутӕ сау-сауит - рудзынгӕй мӕм ракӕсит,

Мӕн къӕбӕда, галиуы, кӕд зӕрдӕмӕ бахӕссит …


Автор: Чехоев Валерий Владимирович