«ЗОНТЫКК, ЗОНТЫКК, КЪÆВДА УАРЫ …»

Зонтыкк, зонтыкк, къæвда уары,
Мæнæ проспектыл фæцæуын,
Мигътæй дон мæныл лæмары,
᾿Рмæстæй, ницæмæ нæ дарын!

Доны култы къæвда хойы,
Кафын, хъазын йемæ хоны,
Кæд мийаг, мæ сусæг, зоны,
Абон уый ӕнцой нæ комы!

Зонтыкк дард мæ хицæй дарын
Мæ мæ сæрыл къæвда уары,
Цъиу-бæдулæй, алкæй уарзын,
Кафгæ-зилгæ æз фæцæуын.

Бон мæ уарзоны рӕвдауын,
᾿Хсæв æй стъалытимæ барын …
Гъе-ныр дæр, мæ цæстыл уайы, 
Зæрдæ уарзонадӕй райы.

Найын къæвдайæн йæ доны
Ӕмæ ничи йæ нæ зоны -
Ай мæ сæрыл къæвда уары,
Мæ цæуыл мæ зæрдæ райы!

᾿Ртæхтæ, ᾿ртæхтæ, къæвда уары,
Абон диссаджы бон дары,
Кафгæ проспектыл фæцæуын,
Мæ дæуыл, мæ уарзон, зарын.

Автор: Чехоев Валерий Владимирович