АФТÆ ДÆР ВÆЙЙЫ

Рæсыд, æнæдаст, бандоныл гуыбырæй,
Мæлдзой цæстытæй цæудждытæм кæсы.
Кæйдæр зæронд, дзæгъæлуагъд куыдз тымбылæй
Йæ къæхты бын æууæндагæй хуыссы.

Кæддæр уыдис уæздан æмæ куыстахуыр,
Кæддæр бынтон æндæрхуызон уыдис.
Фæлæ цæмæндæр карз нозтыл фæцахуыр
Æмæ йæ уд æнæнозтæй рыстис.

Æппæтмæ дæр хæрам æмæ æгуыстæй
Æсси бынтон фыдзæрдæ мæ фæлхæрст.
Æдзухæй дæр йæ маст æмæ æлгъыстæй
Уыдысты хъуырмæ бинонтæ æфсæст.

Нæ цæрдзысты æмуд æмæ æмзондæй,
Куы бамбæрста йæ фæлмæст ус бæлвырд,
Уæд иу дзæбæх бон карз нозты нывондæй
Æвæстиатæй æндæр лæгмæ фæлыгъд.

Йæ зæронд мад фынсайд æмæ ныфсастæй,
Кæй равзæрста æнæуаг цард йæ фырт,
Цыбыр рæстæгмæ бакуырм, стæй йæ мастæй
Уырзацауæй мæрдты бæстæм фæцыд.

Бæрæгбæттæм æй нал хуыдтой сыхæгтæ,
Йæ хæлæрттæн æцæгæлон æссис.
Фæзындысты æмнуазджытæ сæ бæсты,
Цъæх арахъхъмæ йæхи хуызæн æмхиц...

Рæсыд, æнæдаст, бандоныл гуыбырæй,
Æнæсæрфат, æнæрайæ цæры.
Хъуырт-хъуырт кæнгæ аслам арахъ йæ хъуырæй,
Цæ цæсгомыл йæ сæццыгтæ сæрды...

Автор: Басиева Залина Руслановна