ÆХСÆВÆДДÆ

Мæй ленкæй ссыди

Боброны рæзты.

Æхсæв хуыссыди

Йæ фæды фæстæ.

Рухс бонмæ кæсгæ

Изæр фæтæхы.

Æхсæв фæлгæсгæ

Ыссыд йæ бæхыл.

Уый конд у тарæй,

Йæ цæст — ыстъалы.

Æдзухдæр арвæй

Цæхæртæ калы.

Æргуыпп ныл ласта

Йæ тар сау арынг,

Æмæ ысхаста

Йæ базыр талынг.

Йæ тых æртауы

Дымгæ цæгатæй.

Кæрдæг фæйлауы

Йæ тыхджын батæй.

Ысхудти та мыл

Ыстъалы минтæй.

Ныррызти хъамыл

Мæйдары цинтæй.

Æрхуы кæфойæ —

Чи у? Мæй та у.

Æнæрынцойæ

Зынг гага тауы.

Фæткъуы бæласæй

Афон куыд калы —

Ныцъцъыллинг ласы

Фыдуаг ыстъалы.

Мæй ленкæй ссыди

Боброны рæзты.

Æхсæв хуыссыди

Йæ фæды фæстæ. 

Автор: КАМБЕРДИЕВ Мисост