ФÆСТАГ ХЪУЫДЫ

Мæ фæстаджы хъуыды

(Чысылау кæуын).

Фæстаг уынд, мæ быдыр,

Ыстæй уæд цæуын.

Æрттивы мæм дардмæ

Æвзистау æртæх.

Йæ хицауы ’нкъардмæ

Æрæнкъард мæ бæх.

Гъей, иунæджы зарæг,

Дымгæйау тæхай!

Куыд дыл кæнын хъарæг,

Мæ хуымгæнды хай!

Мæ фæстаджы хъуыды,

Мæ æцæгæй фын.

Бæркад-зæрдæ быдыр,

Æз райсом цæуын!

Цæхæрджын сахары —

Мæ амонды гуырд.

Еблагъуæджын хъармы —

Ыскъолаты дзырд.

Ысфæйлау мæ зардмæ

Нæ быдырты цъæх.

Цæудзыстæм та дардмæ,

Гъей, фезмæл мæ бæх!

ХУРМÆ КУРДИАТ

Дæумæ бæллын,

Сызгъæрин хур.

Дæумæ цæуын

Мæ амондгур.

Дæуæн кæнын

Мæ ризгæ зард.

Дæуæн бæттын

Мæ рæзгæ цард.

Зæххыл æртав

Дæ хъæстæтæ,

Дæ цин æрдав

Нæ бæстæтæм.

Дæуæн кæнын

Мæ ризгæ зард.

Дæуæн бæттын

Мæ рæзгæ цард. 

Автор: КАМБЕРДИЕВ Мисост