НЫСТУАН ДЗЕРАССÆМÆ

Абон та демæ

мæ зæрдæ куы дзуры,

дард дæн —

цы зын у,

цы зын...

Гъæй-джиди, чи загъта,

æмæ дæ цуры

абон

кæй авæры

фын.

Зæрдæйы биноныг

ахстон быд тасæн.

Чи зоны ’мæ дын хъыг уой

фаугæ ныхæстæ —

мæ дуне Дзерассæ —

искуы

куы хæссой

мæ кой.

Уый, дам,

йæ фыдæлтæй

бадардта азым,

нал, дам, сын зоны

сæ аргъ.

Уымæн, дам,

рохуаты

къулыл дзыназынц

хъама,

йæ ехс

æмæ саргъ.

Чи ма дын уромы

ахæм фыдгуырды —

къулбадæг —

цас у

йæ ас!

Афтæмæй, акса-ма,

дзыллæты ’мбырды

хистæрæй

айсы ныхас.

Адæмы цæсты, дам,

чи кæна цудгæ —

авæййы

цæстыты сындз.

Домынц мæ:

уынгмæ, дам,

хъазгæ ’мæ худгæ

рацæуы

йемæ

йæ чындз.

Уыцы ныхæстæм ма

дзуапп та цы арон?

Раст куы у

адæмы дау...

Рагæй-æрæгмæ дæр

зæрдыл нæ дарын

зæронд

фыдæлты æгъдау.

Искуы, Дзерассæ,

куы фæуон дæ цуры

(уый дын нæ мысын æдзух?)

Ма мæм-иу радæтт уæд,

курын дæ,

курын,

зæхмæ кæсгæйæ

дæ къух.

Кæлмæрзæн

ма æмбæрз,

ма ’мбæхс æфсæрмæй

искæмæй

де ’рфгуыты сау.

Хатын дæм,

курын дæ,

ма ’рхæсс дæ сæрмæ

зæронд

мæлинаг

æгъдау.

Абад-иу

абад,

мæ зæрдæ,

мæ разы.

Уа ма дæ

истæмæй тас?

Чи дын уромы

дæ цæстыты хъазын

æмæ

дæ уарзон ныхас!

 

Автор: КАМБЕРДИЕВ Мисост