ХЪÆУККАГ ФЫН

Кæдæй-уæдæй ма федтон æз хъæуккаг фын:

Цыма æрцыд хуым кæнынæй мæ фыд.

Нæ тæрхæджы бын — рагъамад картофæй,

Æмæ сæ мидæг царды гуырдз тæлфыд.

Мæ фыд æрлæууыд зоныгыл сæ разы,

Фæкасти сæм, ныуулæфыди арф.

«Нæ тауинаг мæлæты дзæбæх разад,

Бæргæ, фæлæ куы нæ ныннæра арв...

Кæннод нырма мæрдон фынæй у быдыр,

Цы дзы аппарай — доны къусау сæфт...»

Стæй фестадыстæм конд хуымы,

Мæ фыдыл-

Йæ даргъ цинел,

Цы-иу дардта фæсхæст...

Æддиау дард кæйдæр сонт лæппу зарыд,

Мæгуыргурау хуыссыд нæ разы зæхх.

Æмæ дын уæд нæ хуымы хурсыгъд буарыл

Æвиппайды ныссæх-сæх кодта зæгъ.

Нæ сæрты судзгæ арвы ’хсидав ратахт

Æмæ кæмдæр йæ сонт гæрах фæцыд.

Æз фесхъиудтон, æз фехъал дæн мæ уаты.

Лæугæйæ баззад къæвдамæ мæ фыд... 



Автор: ХУГАЕВ Сергей