ЦÆРÆНБОНТЫ ДÆЛЛАГ ГАЛЫ КУЫСТ КÆ...

Цæрæнбонты дæллаг галы куыст кæ,
Дæ сæрыл дæ ысхæцыны бон ма уæд —
Цы у дæ цард:
Бон- кусгæ, ’хсæв- фысгæ,
О, де ’намонд ысфæлдисæг бын бауа!
Дæ нывыконды афтæ фыст æрцыд,
Æмæ йæ хæсс, æнтъух сæрдæй-зымæгæй
Хъуыбадыйау зæронд къæрид кæрцы,
Хъуыбадыйау гуыбыр æмæ тызмæгæй.
Хъуыбады нуæзта сæндæтты сырх сæн,
Йæ зардмæ йын æмбырдтæ кодтой адæм.
Ды та, мæгуыр, дæ дзыллæйы æхсæн
Цæрыс бынтон æнæнымад, æгадæй.
Фыссыс, тыхсыс, дæ удыртау тæпсыгъд
Кæны, бецауаг, бирæ зынг дзы дзаг у.
Фæлæ цы гæнæг дæ, нæ зоны уый дæ сых,
Æрзил ма дзы, дæ чиныг ма дзы ’рцагур!
Уæдæ цæуыл дæ хъиутæ хæрыс уæд? —
Æнцойбон дæр дæ удæн нæй æрбадæн.
Дæ адæмы мæт кæд ысси дæ мæт,
Уæд æй, цымæ, куыд нæ зоны дæ адæм?.. 


Автор: ХУГАЕВ Сергей