ЦАРДЫ ÆДДЕ

Цардæн й’ алыварс зилын уал азы,

Фæлæ, бафтон мидæмæ —

Нæй,

Къулыл хизин —

Мæ ныфс мæ н’ аразы,

Уæдæ йæм дуар та н’ арын бынæй.

Зилын зилæнты,

Джиуын джиуæнты,

Змæлын адæмы къæхты бын.

Искæй бафæрсин, фæлæ чи уæнды

«Ам кæуылты»-йæ фæрсын!

Алчи сызнæт и æмæ сбирæгъ и, —

Хъуысы дæндæгты къæрцц-къæрцц.

Ныр куыд балæууон семæ иу рæгъы —

Исчи м’ аныхъуырдзæн æд кæрц.

Нæй,

Уæддæр мæ уырдæм тынг фæнды,

Уд дæн æз дæр —

адæймаг дæн.

Уыцы рухсадзагъд царды гуылфæнты

Фаг фæленчытæ кæн!

Размæ анцайын — уæнгты цас тых и —

Рæмбыныкъæдзтæй гæрд фæндаг.

Фæлæ бавæййын ногæй мастыхай, —

Уыцы сау къул — къуырма, хъæддаг.

Зæрдæ базмæлы, — ’рхауын зонгуытыл,

Ай цы ’намонд фæдæн, цы ’лгъыст!

Иу лæг нал зыны æдде зонгæтæй:

Чи сæ къулыл цæхгæр ныххызт,

Чи та ссардта лæсæн кæуылдæр,

Ссардта къулы кæмдæр хуынкъ-гом.

Фæлæ ам и нырма сæ фылдæр,

Мæнæ къулмæ лæууынц æнгом.

Чи сæ ирвæздзæн райсом мидæмæ? —

Абыр зыхъхъыры, къулыл лæс!

Иннæ баззайдзæн йе хæс фидынмæ, —

Царды æдде — йæ уæззау хæс.

Уæд цы кæсы, цымæ, мæнмæ та,

Чи фæдардзæни мæныл та й’ арм?

Уым, мидæгæй, нæ мæлынц мæ мæтæй,

У æвæрæз æддаг дуне ам.



Автор: ХУГАЕВ Сергей