ÆРХУЫ БАРÆГ

Æрхуы барæг, дæ хъуыды — арф,
Дæ балцы дæргъæн нæй ыссарæн.
Кæм иу кæнынц зæхх æмæ арв
Æмæ сæ чи кæны æмарæн,
Гъе уыцы зиллаккæн йæ фæстæ
Цы дуне федтай ды, цы бæстæ?
Поэтæн ма æргомæй зæгъ,
Кæдæм, кæдæм тæхы дæ бæх?
Йæ фæстæгтыл Невайы сæрмæ
Цы лæууы стæхынæввонг, цы?
Кæддæр æбуалгъ цæфхæдты хъæрмæ
Евген фæлæбурдта йæ сæрмæ,
Ныккæрзыдта, йæ зонд фæцыд...
Зынд æм дæ тызмæг аууон мигътæй,
Цыма йæ маргæ кодтай, хурх.
Æмæ кæд уый хъæрмæ фæджих дæ?
Бæрзонд кæд уымæн систай къух?
Нæ! Зондцухы хъуырдухæн, катай
Нæ айхъуыстай, рæстæг нæ уыд...
Сæррæттæй уайын дæ кæм хъуыд,
Дæ уд гъе уыцы балцæн радтай,
Æмæ куы фестадтæ æрхуы.
Куы лыгъдысты Невайы разæй
Æвирхъау донивылды тасæй,
Уæд уыдон хъыг æмæ зынмæ
Тызмæгæй кастæ ды бынмæ.
Цæуыл уыди дæ сагъæс, барæг?
Цæуыл уыди дæ мæт уæддæр?
Кæцæй, цы дугтæй хъуыстай зарæг
Æмæ Уæззау тохы уынæр?
Æви зынгзæрдæ декабристты
Дæрæнгонд рухс бæллицты тау,
Сæ маст, сæ цин æмæ сæ рыстæй
Цы зарæг райгуырд, ды рæхыстæй
Уый хурх кæнынвæнд скодтай, ау?
Цы дзурын æз? Ныббар мын, барæг.
Æз зонын, ис дæуæн зæрдæ.
Æз зонын, ды нæ уыдтæ марæг.
Дæ сæрты тохы хъæр, йе хъарæг
Куы тахти, уæд уыдтæ цæттæ
Фæранкау карз хæсты хæцынмæ.
Фæлæ дæуæн æндæр хъысмæт,
Æндæр хъуыдытæ æмæ мæт
Ныффыстой царды фæтк. Уырны мæ,
Ды федтай маст, ды федтай амонд,
Ды федтай «Тугæйдзаг хуыцаубон»,
Дæ уазал дурыл туджы пырх.
Фæлæ уæддæр нæ саст дæ тых.
Ды хъуыстай карз тохы уынæрмæ,
Кæйдæр æртхъирæн зылд нæ сæрмæ:
«Нæ бартæ байсдзыстæм тыхæй,
Æгас цæуæд сæрибар!»
Стæй
Тæхгæ уад æмæ зилгæдымгæ
Нынниудтой... Туг та ногæй калд:
Цагъар йæ рæхыстæ ыскъуынгæ
Ысласта кард... Фæлæ фæкалд...
Ды хъуыстай ахст адæмы зарæг,
Сæ рыст æгæр уыди, æгæр.
Фæлæ, о разагъды бæхбадæг,
Дæ балц нæ рох кодтай уæддæр.
Дæ дугъоныл куыд æнгом бадтæ,
Фæдисонау цы балцы уадтæ?
Æрхуы барæг! Поэтæн зæгъ,
Кæдæм, кæдæм тахти дæ бæх?
Нæ, мацы зæгъ! Фæлтау ныффæраз,
Кæннод ныййазæлдзæн æваст
Зæйы хъæрау, æрвнæрдау раст,
Æмыр зыланггæнгæ дæ хъæлæс.
О, мацы зæгъ! Æмбарын æз
Дæ царды стыр нысан, дæ хæс.
Мæнæн дзырдтой: уæлахиз хæсты
Куы бырстой барджытæ дæ рæзты,
Уæд фестъæлфыдтæ ды куыддæр,
Дзыллæты фервæзыны охыл
Куы ныннæрыд «Аврорæ» тохы —
Бæрзонддæр систай ды дæ сæр...
О, уагæр, уагæр, де 'рхуы зæрдæ
Цы уарзт, цы цин æнкъардта уæд?
Дæ балцæн кæд йæ кæрон ссардтай?
Æви дын ног дуг ног тых радта,
Æмæ фæтагъддæр и дæ уад?
Æрхуы барæг! Ды ссардтай амонд
Дæ уадæмдзу бæхыл. Лæгæрд
Æмæ æдзух фæлтæртæн амон,
Кæй ысуаид æрмæстдæр аууон
Зæххыл æнцад лæугæйæ цард.
Кæдæм фæхонынц дæу дæ сæнттæ,
Æрхуызæрдæ, æрхуыхæцъæф,
Кæрон дæ балцæн нæй, уырнæд дæ!
Фæлæ дæ бæхæн ис цæфхæдтæ,
Æмæ йæ де 'рхуы ехсæй цæв!




Автор: МАЛИЕВ Васо

Другие стихи автора