МÆ ИРЫСТОН!

I
Мæ Ирыстон!
Дæ сау лæппу цы зæгъа?
Дæ уагъд рæгъы
Ыздыхт сыкъа нæ систон.
Дæ зад дыргъдонмæ булæмæргъ æртæха,
Фæфыссой дыл
Сыгъдæг сыгъзæрин систæ
Дæ уарзт æмæ дæ сагъæсты æмуагон
Цытджын кадæг.
Æз та цы дзурон уæгъды?
Æз дæн мæгуыр,
Фæсусхъæлæс фæндаггон.
Мæ балц — цыбыр —
Дæ дæлвæзтæ,
Дæ дæгъты —
Йæ кæрон дæр,
Йæ райдайæн дæр —
Хæхты.
Æз дæн, мæ Ир,
Дæ бæрзæндтæй дæлдæр,
Фæлæ дæ номæй
Бонджын дæн уæддæр.
II
Мæн ысты, мæн,
Дæ зарджытæ,
Дæ хæхтæ,
Дæ арвæрттывд,
Дæ комы тæф —
Æврæгътæ,
Дæ быдыры æнæнымæц рæгъау.
Хъæздыг дæн æз
Хуыцау æмæ зæххау,
Æлгъин дæн æз
Дæлимонау мæ исыл:
Дæ фæзты уымæл
Хуры тын куы сисы,
Уæд уый дæр, Ир,
Мæ цæстыхаутыл зайы,
Дæ мит хæхбæсты
Рагуалдзæг æртайы,
Фæлæ йæ ды
Мæ сæрыхъуынты
Ссар,
Куы урс кæна æнафоны
Мæ сæр...
III
Нæ хаттæн æз
Нæ фыдæлты хæтæнты,
Сыгъзæрин саг
Лæгæтрæбын нæ фехстон.
Ныббар мын, Ир,
Мæ рæуныхас,
Мæ сæнттæ,
Фæлæ дын æз
Болатдзагъд фырт
Куы фестон,
Гъе уæддæр зон:
Мæ хоры кæнд —
Дæ хуымæй,
Гъе уæддæр зон:
Мæ цæстысыг —
Дæ донæй,
Мæнмæ цы ис,
Хъæздыгдæр не сдæ уымæй,
Æз бонджын дæн
Дæхи ис æмæ бонæй.
Фырты лæггад
Куыд ахада цæсты,
Кæд мады хæрзтæ
Фидинаг ысты?
IV
О, де 'видийгæ авналæнты арфы
Кæд, чи зоны,
Сыгъзæрин тала бахус,
Кæд, чи зоны,
Æнафоны дæ арвыл
Тæхгæ-тæхын
Æрттивгæ стъалы ахуыссыд,
Гъе уæд фæку, мæ Ирыстон!
Дæ цæссыг,
Дзæнхъа дурау,
Нæ зæрдæты ныххауæд,
Æмæ нын зæххыл
Удыбæстæ ма уæд,
Куы ныккæла
Дæхи дурæй
Дæ мæсыг!




Автор: МАЛИЕВ Васо

Другие стихи автора