БÆЛÆСТЫ АУУОН ДОНИСÆНЫ СÆРМÆ...

Бæлæсты аууон донисæны сæрмæ
Гæзæмæ хъуысы дондзау чызджы зарын,
Æмæ та ног, мæ ныгуылд хур, ныббар мын,
Æрыхъал ис мæ рох хъынцъым фæстæмæ.
Æрыхъал ис мæ сæфт бæллиц мæ риуы,
Мæ цæстыл уайы халасдзагъд дзæгæрæг.
Мæ зарæг кæд дæ цæссыгимæ сиу и?
Мæ сæфт бæлоны къалати — æдзæрæг,
Йæ пакъуы калгæ атахти кæдæмдæр...
Мæн агургæ дæ цин æмæ дæ тыхсты,
Кæд, чи зоны, æнафоны дæуæн дæр
Мæ рохст сурæт дæ цæстыты раз сысты,
Фæндон дын нæй, лæууæн дæр, стæй цæуæн дæр,
Кæд абон бадыс саударæн фæлысты...




Автор: МАЛИЕВ Васо

Другие стихи автора