ЧЫНДЗЫ ФÆЦЫДТÆ ДАРД БÆСТЫ ÆНДÆРМÆ...

Чындзы фæцыдтæ дард бæсты æндæрмæ,
Æз та мысын нæ уалдзæг æмæ дзурын:
«Нæ зары дондзау донисæны сæрмæ,
Нæ зыны гогон донкæлæны дурыл...»
Æнкъард нæ дæн... Мæ тыхст æмæ мæ зыны
Чызджы хуызы мæ Уарзондзинад хатгай
Æбæрæг фынты зилдухы фæзыны
Æмæ ныззары уалдзæджы æвзагæй,
Дыдзыуагъд ронгау бацæуы мæ сæры,
Куы фесты риуы рагбонты мысинаг,
Куы фесты маргъ,— йæ базырты пæр-пæры
Ысиу вæййынц гуырысхойы æрдиаг
Æмæ æнхъæлцау бонты дард уынæры
Дзæбæх кæй хатын, уыцы диссаг зарæг.




Автор: МАЛИЕВ Васо

Другие стихи автора