ЦЫ УЫДИ ЛÆГ, УЫЙ НАЛ ФЕСТДЗÆН ФÆСТÆМÆ...

Цы уыди лæг, уый нал фестдзæн фæстæмæ,
Тæхудиаг æрдзы фæтк æмæ уагыл
Уæлахиз чи уа, ахæм дард фæндагыл
Дзæм-дзæмы донæй чи раздæхт фæстæмæ!
Кæд скурдиаты хъомыс нæй мæ дзырдты,
Уæддæр мæ фæндыр рухс фидæныл зары.
Тæхудиаг, куы базонид, йæ мырты
Дæ адзалæн аккаг мадзал ыссарын.
Нæ фæзты ногæй дидинджытæ 'рттивынц,
Æмæ тæхынц гæлæбутæ сæ сæрты.
Бæсты рæсугъд, дæ чызгон бонты фидыц
Уынын хæхбæсты уалдзæджы æууæлты.
Уый нал у дæу, фæлæ æрдзон у ныр,
Мæнæн та фестад номхæссæн фæндыр.




Автор: МАЛИЕВ Васо

Другие стихи автора