РАГОН ЗАРÆГ

Уайынц бæхтæ, уайынц бæхтæ
Быдырæй хъæмæ.
Бричкæ гакъонтæ фæндагыл
Фесхъиуы хæрдмæ.

— Гъей,— зæронд бæхтæрæг зары,—
Дондзауты кæстæр
Уарзта мæн, фæлæ йæ ниугæ
Ахаста æндæр.

Тохы, тохы заман скодта
А дунейы уæд.
Æмæ цыд йæ сæфты балцы
Сау хæхты цæуæт.

«Гъей, хæрзбон, хæрзбон, хæхбæстæ!» -
Барджытæ дзырдтой.
Æмæ чызджытæ хъæугæрон
Сусæгæй куыдтой.

Уæд йæ сау хызы мæ фæстæ
Ме сæфт дондзау каст,
Æмæ тар хæдзары азым,
Ахст бæлоны маст,

Гъей, фæндагсарæн фæхастон
Ацы боны онг...
Гъей, мæ бон, Бугурусланы
Ахауди мæ цонг...

Згъорынц бæхтæ, згъорынц»бæхтæ
Быдырæй хъæмæ,
Бричкæ гакъонтæ фæндагыл
Фесхъиуы хæрдмæ.

— Ехх,— зæронд бæхтæрæг зары,—
Дондзауты кæстæр
Уарзта мæн, фæлæ йæ тары
Ахаста æндæр.




Автор: МАЛИЕВ Васо

Другие стихи автора