БАЛЛАДÆ ХЪÆДГÆСЫ ЧЫЗГЫЛ

Хъæдгæсæн уыд иу чызг... Сагъæстæй уыд хызт,

Донгæрон йæ уæрыкк гогызтимæ хызт.

 

Дард уадындзы зарын хаста чызгмæ уæд

'Взонг фыййауы сагъæс, 'взонг фыййауы мæт:

 

«Ой, зæгъы, цы кæнон, ой, зæгъы, цы уон:

Агуры цæф сæгуыт хурсыгъд бæсты дон...

 

О, сыгъзæрин феста донгæрон уæ хъæу,

Ауалдзæг кæм федтон дондзаутимæ дæу».

 

Чызг фыййаумæ барæй алы фау хæссы,—

Дымгæ дард уæтæрмæ ахæм дзуапп хæссы:

 

«О лæппу, дæ уадындз баззайа дзæгъæл,

Кæд æвзонг зæрдæмæ не ссардта дæгъæл!»

 

Æмæ сусæг хабар хъæубæстыл фæпырх:

«Мигъæмбæрзт æфцæгыл иу уадындз ныппырх.

 

Уым тымыгъ нынниуы, уым тымыгъ кæуы

Уым сæрсæфæн тигъыл сау лæппу лæууы...»

 

Бонырдæм фæзынди кæрдæгыл æртæх,

Бонырдæм ныууасыд хъæдгæсæн йæ бæх.

 

Саурæсугъды фатау тар кæмтты хæссы,

Бонвæрнон уæларвæй барæгмæ кæсы.

 

Гъей, нæртон фæдисон, хорæй хаст дæ бæх,

Гъей тæссаг цæуæнты къахвæндæгтыл тæх!

 

Уæртæ тигъæй разынд фыййæутты уæтæр,

Артдзæсты фæныкæй ферттивы цæхæр.

 

Æмæ лæппу рауад барæгмæ æваст:

«Саусынтау æртахти сау хабары маст,

 

Æви цины уацæй райхъал и мæ хъæу?

О æхсæвдзу, чи дæ, чи рарвыста дæу?»

 

Хохы арф уырынгты цъитидон тæхы...

Саурæсугъд фæхудти, саурæсугъд зæгъы:

 

«Хъæдгæсæн уыд иу чызг, сагъæстæй уыд хызт,

Донгæрон йæ уæрыкк гогызтимæ хызт.

 

Фæлæ дард æврæгътæ, сау хæхты фæстæ

Уый йæхимæ сайдта диссаджы бæстæ:

 

Зымтæ уым фæуасынц, уым тæхы цæргæс,

Уым нындзыг къæмбыртыл арвы цъæхы бæрз.

 

Уым дзæбидыр рисгæ уады хъæр мысы,

Рагъсæрæй æнкъардæй дунемæ кæсы.

 

Уым сыгъзæрин уадындз сау къæйтыл ныппырх...

О, фæсмон фæкæна, басæтта йæ тых,—

 

Кæд дæ цуры мæнæ уыцы чызг лæууы...

Кæд хæринаггæнæг фыййæутты хъæуы?»



Автор: МАЛИЕВ Васо

Другие стихи автора