ФЫН

Арв, фыд уарынæй нæ бахиз, арв, сыгъзæрин æртæх
ратт!
Уæртæ доны фæстæ пыхсы гоппон цъиу æрбадт.
Арв, зæронд хуымгæс фæллад у, бауадз æй хуыссын.
...Уайы дард бæстæй фæдисон, агуры фысым.
Ма ма аныгуыл, дыдзы хур, бастади йæ бæх,
Ма ма аныгуыл, йæ развæд нал уыны дзæбæх.
<<Чи у а фæндаггон?» — дисы бацыди хуымгæс.
Барæг уайы æмæ дзуры: «Балцы цæуын æз!
О, дада, мæнæй фæстæмæ ничи ис дæуæн,
Фæлæ ды мæ фæдыл ма кæс, нæй мæнæн лæууæн.
Æз æргъæу дуры бын донбыл иунæгæй хуыссын,
Саст бæлццонау дард фæндæгтæ сусæгæй мысын.
Кæд мæныл, мæныл фæкæуы ме схæссæг гыцци» —
Сау фыстæг æм сау быдырæй уацхæссæг фæци:
« Ой, кæйдæр зæххыл дæ иунæг дон кургæ æрхауд,
Ой, фæстаг хатт ма йæ цæстыл Иры бæстæ уад...»
Ма кæуæд, æмæ мæ цыртыл ма 'рцæуа къæвда,
Ма кæуæд! Мæ дудгæ цæфтæ нал риссынц, дада.
Ехх, цы мæ ферох, нæ зонын, нæу мæ бон мысын,
Æз мæ уæхсчытыл кæдæмдæр зæххы уæз хæссын.
Кæд мæныл фæзары дондзау, уæд фæстæмæ цон —■
Бон æмæ æхсæвы астæу ис сыгъзæрин дон,
Уым сæударæй гогонимæ рацæуы чызгай,
(О дада, дæ сæфт бæлццоныл ма фæу тæргай.)
Цæй, хæрзбон! Дæ фырт уæлæуыл бафыста йæ хæс,
Урс бæхыл тæхын æврæгътæм урс фæскъауæй æз...
Фыд уынæргъы, фыд дзыназы: «Бауром дæ бæх!»
Фæлæ фехъал. Цæстыхаутæм рахъуызыди 'ртæх.
Рацыд уарын. Арв ныннæрыд фæсхæхты кæмдæр.
Афтæ сусæгæй фæкæуын хаттæй-хатт æз дæр.




Автор: МАЛИЕВ Васо

Другие стихи автора