АЗЫМ

Мæ мæгуыр куыдз! Рæйыс та мæймæ стонгæй,
Æз та хуыссын нæ сарайы къуымы,
Дæ ниуынмæ æрыхъал вæййын ногæй
Хъуырдухæнгæнгæ æхсæвы фæлмы.
Уынын цыдæр æндæргты зилдух, мæнæ
Кæрæдзи сургæ айсæфынц æваст.
Мæ цæстытæ æрæхгæнын фæстæмæ,
Фæлæ нæ уадзынц аууæттæ сæ хъазт.
«Цы сты цымæ?» — мæхимидæг ыстыхсын.
Цы сты, цы сты? Мæ уæнгтæ мын ныббаст?
Æви мæ удыл джазы 'хситт ныттыхсы,
Æви та расыг чызджыты цъæхахст
Мæ фæдыл зилы мастисæгау тары?
Æви мæ айсы сонт худты уылæн?
Цæрæм та иумæ мах нæхи хæдзары,
Дæуау æз дæр æнæхуыссæг фæдæн.
...Уый раджы уыд... Мæ фæдыл кастæ,
Нæ зыдтай ды, кæдæм фæцæуын æз.
Æнæуынæрæй атахтысты азтæ,
Æнæуынæрæй базæронд нæ къæс.
Мæн басыгъта мæ хивæнд уды азым,
Фæллад горæтты азæлгæ тæмæн...
О, ма мæм кæс,— ныккæудзынæн дæ разы,
О, ма мæм кæс,— цы фæдæн, уый фæдæн.
Æрцыдтæн ныр зæронд æмæ фæлладæй,
Цæй зын дæ, цæй, æрæджиауы фæсмон!..
Æрттивы Бонвæрнон, æрттивы дардæй.
Хуымонты зарын райхъуысти... Æрбон...




Автор: МАЛИЕВ Васо

Другие стихи автора