РОХСАНÆ

Ногæй æхсæвы сæнтсау кæл-кæл, ногæй мæ рухс
бæсты дзуар
Дард бæстаг науау,
æрхуымы сакъадах —
мæ зæрдæмæ 'рбахъуызы.
Цыма сылгоймаг æфсæн чъилтæй хойы йæ
хæзгулы дуар,
Афтæ хъысмæты æмыр барабанты хъæр
райхъуысы.

Сагъæсты скъуыддзæгты, удты къæрттыты
æмтъеры гуылфæн —
Æхсæв йæ кæлæнтæ дары йæхимидæг карз сæны
дурынау,
Ссары зæрдæйы сыгъзæрин хæзнаты æвæрæн
Йе сау уæрм — мæлæты æрфæн,
Азæлы дунейыл Бахы сконд Мессæйау,
Йе Мефистофелы дзурынау.

Чи дæ, кæцæй дæ, Рохсанæ? Кæд ме скурдиат
бауагъта гуырдз
Ацæуæг бонты хæтæнхуагау чи зилы, уыцы
æрхæндæджы?
Рогдæр нейлонæй — дæ къаба, сæнтурс сæнттæй
бахуыд,—
Æмбæхсы дæ гуыр,
Риуты сæрибар монц сейфы гуыдырау æлхъивынц
дыууæ 'гънæджы.
Уыдон дыууæ 'гънæджы не сты,
Æрдзæй дыууæ хъыджы дары мæ уд:
Иу у нæ рагфембæлд, иннæ — æнусмæ фæхицæны
карз тæрхон.

Дунейы рухс мæ æрмæстдæр
дæ диссаджы фидыц уынынмæ куы хъуыд,
Фæлæ мæ сау зæхх æлвасы йæхимæ,
Рохсанæ, дæ фæдыл куыд атæхон?
Ногæй æхсæвы сæнтсау кæл-кæл, ногæй, мæ рухс
бæсты дзуар,
Дард бæстаг науау,
æрхуымы сакъадах — мæ зæрдæмæ 'рбахъуызы
Чидæр дæ бæсты æфсæн чъилтæй хойы мæ
хæдзары дуар,
Æви хъысмæты æмыр барабаны хъæр райхъуысы?




Автор: МАЛИЕВ Васо

Другие стихи автора