ЙÆ РУХС ЙÆ МÆЛÆТЫ ФÆСТÆ КÆМÆН ÆРХÆЦЦÆ ЗÆХМÆ...

Йæ рухс йæ мæлæты фæстæ кæмæн æрхæццæ
зæхмæ,
Гъе ахæм стъалыйау æрттивыс дард кæцæйдæр.
Нæ рауагътай Рæсугъддзинад йæ рæгъмæ,
Фæсырдтай йæ дæхицæй дæр, æрдзæй дæр.
Фæрæдыд Сфæлдисæг, кæй не 'рцыд урæд
Сылгоймаджы уæлдæр фидыц нæ Зæххыл.
О, цал хатты ма агурдзæн дæ сурæт
Йæ конд хъуыддæгты рухс æмæ фыдæхы.

Фæлæ æнæнымæц хуызты æгæрон хуымы
Дæ диссаг фæлгонц нал уыдзæни ссарæн.
Мысдзæн дæ уд æнæбæрæг æрхуымы,
Уыдзынæ алкæй бастъæлд цины карæн.
Æз ацыдтæн.
Ды баззадтæ æнусмæ.
Мæ сабидуг — æрвхуыз æртыты фарсмæ,
Æууæнчы фидиуæг, сæ дыдзы рухсмæ,
Кæллæнгæнæгау сайыс мæн дæ размæ.




Автор: МАЛИЕВ Васо

Другие стихи автора