ЧИДÆР

Чидæр мæм фæстейæ дзуры,
Чидæр мæм фæстейæ сиды,
Чидæр мæ иу цыдæр куры,
Чидæр цæмæйдæр æвзиды.

Чидæр мæ фæсмæкъуыр зары,
Чидæр — мæ дуарæхгæд уаты,
Чидæр цыдæр хъарм æнкъары,
Чидæр цыдæр азым хаты.

Чидæр! Цы дæ æмæ чи дæ?
Чидæр! Цы лæууыс мæ фæстæ?
Ницыйæ истæмæ хид дæ,
Æви фыдфын дæ æрмæстдæр?

Цымæ мæм чи дзуры, стæ-ма,
Сонтæй фæкæсын фæстæмæ,
Фæлæ цæстныкъуылдæй къаддæр,
Мах царды чи нæу нымад дæр,

Уый бæрц чысыл уысм æрмæст
Алкæд куы кæнын æрæджы,
Æмæ мæ фæстæ цæрæджы
Уый тыххæй н 'ахсы мæ цæст...

Чи зоны, искуы уыд ахæм
Иу минут æрдзы фæдзæхстæй,—
Фембæлды бар уыди махæн,
Фæлæ нындзыг дæн æргъæвстæй.

Чидæр — егъау цыты уддзæф
Баззади рохæй куырм удыл,
Чидæр — бæрзонд ныхы тугдзæф,
Не 'рцыд хæцъилæй баст. Дуды.




Автор: МАЛИЕВ Васо

Другие стихи автора