ДÆУÆН НÆ УЫДИ А ЗÆХХЫЛ ХÆДЗАР...

Дæуæн нæ уыди а зæххыл хæдзар,
Кæйдæр кæртæй дын рахæссынц дæ чырын,
Хъæбæр пъадосау фидар у лæгдзарм,
Æндæр дæуау кæй бон бауид фæцæрын?

Куыд райгонд дæ мæрдон фынæйæ, куыд!
Цыма пахуымпар стырдæр мидис ссардта
Æмæ зæххыл æцæгдзинад цы уыд,
Уый хъазæн хъулау суилын æввонг дардта.

Æрæнцади зæххы æмуæз хъуыды
Йæ тæссаг тарфы джипп-уагъдæй дæ ныхыл.
Æппынфæстаг Рæстдзинад ссардтай ды,
Гъе уымæн хæцыс ацы хатт дæ дзыхыл.

Фæлæ дæ роцъо — чи уыди æнхъæл! —
(Æфцæгготы æмбæхст уыди уæлæуыл),
Ныр та дæ уды барджындæр æууæлау
Зыны чырынæй — барджын æмæ схъæл.

Фæстаг гадзрахат бакодта дæ хæстæг;
Дæ къулбæрзæй дын сраст кодта, цæмæй
Цæуа йæхæдæг къулсæрæй дæ фæстæ,
Цыма зындæр у æгæстæн дæуæй.

Цыма æвиппайд бамбæрста: цы хъуаг сты,
Æрцæудзæн уый дæ мардимæ æвæрд.
«Мæлдзыджы дæр нæ бахфæрдтаид, ауыстæн,
О, ахæмтæн нæй цардамонд лæвæрд».

Кæд афтæ у, уæд азымы кæй дара?
Кæд афтæ у,— хъыг кæнын дæр — æнцон.
Уæззау æгъдауы бавæййы йæ бон
Цыдæр æмбæхст æхсызгондзинад ссарын.

О, ахæмтæн нæй цардамонд лæвæрд,—
Цыбырдзырдæй, йæ цæсты дæ æдылы.
Лæгау лæджы гакк царды сойы 'вдылы,
Ды та фæндæгтæн равзæрстай сæ хæрд!

Æрæджиау фæсмоны рис æртыхсти
Мæ зæрдæйыл цъæхснаг уисы цæфау:
Æз дæр хуыдтон «æгуыдзæг» дæу дæ тыхсты,
Æвæрдтон дыл зынæрвæссонæй фау.

Æнæбонты Рæстдзинад мыл фæтæргай,—
Æххуысы бæсты йемæ кодтон хыл.
Дæ дард хæстæг йæ машинæ сындæггай,
Тæры фæллад мæрддзыгойы фæдыл.

Æваст цæмæйдæр фестъæлфыд мæ зæрдæ,
Тæссаг хъуыдыйæ барызти мæ буар:
Дæуæн кæм нæ уыд а зæххыл хæдзар,
Куы скæна уым дæ дард хæстæг цъæхсæртæ!




Автор: МАЛИЕВ Васо

Другие стихи автора