ХÆРЗÆХСÆВ УТ, МÆ ФЫСЫМТÆ!..

Хæрзæхсæв ут, мæ фысымтæ! Мæ зын
Уæ ныллæг къæсæй тарст хуыснæгау атахт.
Æрæнцади мæ цæстыхауты бын
Мысинæгты æнæкæрон паддзахад.

Уæйлаг нымæг — уæ зæрдæтау фæлмæн —
Ныттыхст мæ буарыл аргъæутты пæлæзау.
Æмæ кæйдæр кæлæнгæнæг хъæлæсау
Æрхуыдта ногæй ивгъуыд бонтæм мæн.

Хæрзæхсæв ут! Уæ ныллæгцар хæдзары
Æз федтон ногæй ссæдз азы фæстæ
Мæ мæгуыр мусонг обауы фæстæ,
Йæ къæсæрмæ æххормаг саби зары.

Цæуын хъæуы, æндæр гæнæн мын нæй.
Уæ арахъхъ бацыд иу чысыл мæ сæры.
Уæ уæзæгыл цы акодтон фынæй,
Уый, чи зоны, æппæт хæрзтæй хуыздæр у.

Хæрзæхсæв ныр! Бæрзонд хохыл цæрут,—
Æнæхъæн дуне хорз уыны уæ рудзынг.
Кæсут-ма: дæлæ стыр горæты уд,
Кæлкæлгæнгæ, цырæгъты рухсы судзы.

Уыдзæни уым кæркуасæнты дуэль...
Дыууæ гæрахы æмæ иуы бастъæлд...
Рæхджы фæллад ингæнкъахæджы бел
Æркъахдзæни мæ таурæгъы фæстаг стъæлф.

Уæд тагъд кæнын куы нал хъæудзæни мæн
Зæххон хъуыддæгты иугæндзон цырыны.
Хæлардуаг, байвæд мумийы хуызæн
Мæ мидбыл худдзынæн чырыны,—

Кæй æрцыди мæ секундант æлхæд,
Кæй мæм радта мæнг фатимæ дамбаца,
Кæй нæй Хуыцау, кæй не 'рцыди æфхæрд
Мæ марæг — саууд, саугадзрахат, гадздза!




Автор: МАЛИЕВ Васо

Другие стихи автора