СКИФТÆ

Ирыстон —
Уый аргъау у нарты æвзагыл,
Ирыстон —
Уый сабийæ бадти
Сыгъзæрин фын — сагыл.
Ирыстон йæ арцæй Хуыцауы фæнд ивта.
Цыдысты æнæнысан стæры
Æнæхæдзар скифтæ.
Æнæхæдзар скифтæ!
Кæдтохы уæ зæрдæ
Фæстагоныл сивта?
Цы баззад уæ фæдыл?
Адзалы уынæр æмæ мифтæ.
Æрвгæрон æнцайы
Уæ сæры къуыдыртыл.
Æгæрон быдыртыл
Кæйдæр аууон уайы.
Уый скифты æртхутæг
Йæхицæн нæ ары бынат.
Кæддæр уын хуыцæуттæ лæвæрдтой
Фыдгулы сæры цармæй худтаг,
Уæлахизы ронг æмæ фат.
Кæддæр уын æвæрдтой
Сыгъзæрин фæлысты уæ мард,
Цæмæй уын уæ уæнгтæ
Зæххы æмуæз обæутты бын
Ныббæттой алæмæты згъæр æмæ фын.
Æнæмæлгæ барæгау
Згъорынц фæндæгтæ.
Бæхы хуыррытт...
Хъæр æмæ ахст...
Æндон цæхæр калынц цæфхæдтæ,
Мæлæты æгъатыр цъæхахст
Нæ фыдæлтæм худæгау каст,
Уыдис сæм æппæт дæр:
Къæйдурæй — нывæрзæн,
Нæргæ кад,
Æрвон уарзт,
Æхсар.
Нæ сæм уыд æрмæстдæр
Сæ мæрдтæн цыртдзæвæн,
Æгæстæн — къæсæр.
Цыдысты, цæмæй-иу сæ фæдыл
Фыдбылыз цæуа,
Фыдæлтæ æрмæстдæр гъе уымæн уыдысты,
Цæмæй-иу хъæбатырæй амæлæн уа!
Зæхх бафтыдтой арты,
Арв скъуыдтæ хæцъилау
Сæ джебогътыл систой.
Цы нæ уыди царды,
Уый домдтой Хуыцауæй,
Уый арвы кæрæтты
Хæстмондагæй агурын систой.
— О скифтæ!
Æнæхатыр, скифтæ!
Æрлæуут!
Æрхауди фæндагыл уæ рифтаг,
Æрлæуут!
Уым ницы ис ницы фæстагæтты номыл,
Æрлæуут!
Уæ фæндаг фæцæуы сæрсæфæны комыл,
Æрлæуут!
Æнæфæугæ стæрты
Уæ мыггаг цæрдудæй ныгæнут,
Æрлæуут!
Уæ цирхъытæй гутæттæ скæнут,
Хуымгæнæджы сагъæс уын фестæд фæндагсар!
Ис зæххыл æндæр цард.
Ис чиныг, ис базар,
Ис Рим,
Ис Элладæ!
Мæ фыдæл!
Ды тугкалæн тохтæй фæллад дæ,
Фæлæ дын нæй иу ран æрлæууыны бар:
Ды не скодтай зæххыл
Дæхицæн хæдзар.
Дæ фæстæ нæ баззад
Фæстагæттæн мулк.
Дæ буар дын æхсыны
Сыджыты бын зулкъ.




Автор: МАЛИЕВ Васо

Другие стихи автора