МУСОНГ

Мæ рагбæллицты халагъуд,
Кæддæрау нал лæууыс хуымгæрон —
Ды а дунейæ
Сайд æрмдзæфау ацыдтæ,
Куыд ацæуынц фæсхæст акъоппытæ.
Куыд ацæуынц къанæутты
Сабиты гæххæттæй конд наутæ.
Акъоппытæ баззайынц
Зæрдæты къахтæй.
Гæххæттæй конд наутæ
Сæ фæдыл
Æнæкæрон денджызмæ
Сабиты 'рхонынц.
Мæ мусонг,
Мæ рагбæллицты халагъуд!
Æмбæрзт уыдтæ
Ногкарст кæрдæгæй,
Æмбæрзт уыдтæ
Хур æмæ мæйы æрдæгæй,
Мæ сæнтты рæдзæгъдтæй,
Мæ сусæг бæллицты скъуыддзæгтæй.
Æрхауæг фæндыры фæстаг хъæрау
Зæрдæйы азæлы
Дæ дард уынæр —
Судзгæ мысинаг.
Дæ къаннæг,
Дæ хæрз ныллæг дуарыл
Сæргуыбырæй хизын кæй хъуыд,
Гъе уымæн дæм
Стыр лæгтæй чидæртæ
Кодтой мæсты.
Цæмæй зыдтой уыдон,
Уæгъдæй-иу кæй бацыд
Æнæкæрон дуне
Дæ чысыл
Æртæкъуымон дуары
Æнæкæрон фæлгæтты 'вæрд нывау.
Цы фæдæ, мæ мусонг —
Мæ сабион дуджы халагъуд?
Æддæгуæлæ цъæхсæр хæдзæртты,
Газетты киоскты,
Дуканиты раз
Æз куыд мысын дæу!
Тæхуды ногæй
Дæ къаннæг дуарæй
Дунемæ ракæс...
Мæ мусонг —
Сæнтты пæррæст...
Бæллицты скъуыддзæгтæ...
Ногкарст кæрдæджы тæф...
Мæй...




Автор: МАЛИЕВ Васо

Другие стихи автора