НАЗЫМ

Æз зонын,
Дæуæн дæ зæрдæ рысти
Уæззау хъадаманты хъæдгомау.
Æз дæр рынчын дæн дæуау
Æртæхдзаст дидинджыты тæф,
Сæуæхсиды дард пиллон
Æмæ ноггуырды фыццаг цъæхахстæй,
Дæ хъыг æмæ дæ цйнæй —
Зæххы фыдæх æмæ æнусон рæсугъддзинадæй.
Зæгъ-ма, Назым, мæнæн — æнæзонгæ поэтæн,
Цы кодтай,
Куыд кодтай,
Æнафоны-иу куы райхъал дæ,
Дудгæ хъыгæй йеддæмæ кæм ницыуал баззад,
Уыцы зæйуатау афтидæй,
Дæ фырт Мамедыл кæугæ?
О поэт!
Дунейы сконды сусæгдзинæдты арфы
Ацыд дæ зонд хорхæссæг хохагау.
Дæ зæрдæйы астæу цыргъ карды æрцæфау
Æрхауди ссæдзæм æнусы рухсмæ цæуæг
Мидхъуырдухæн.
О поэт,
Дыууæ дихы фæдæ: зæххон æмæ уæларвон.
Ныр баулæф мæ уарзон
Фыдыбæсты хъæбысы,
Мæ цæссыг мæ цæстыхаутыл
Куыд фæулæфы, афтæ.




Автор: МАЛИЕВ Васо

Другие стихи автора