ЧИ ЗОНЫ, НИКУЫ ДÆ ДУНЕЙЫЛ

Лæууынц телыхъæдтæ,
Сæ уæхсчытæй ивазынц телтæ.
Телтыл дыууæрдæм
Къуыззитгæнгæ тæхынц
Алыхуызон хабæрттæ.
Бæндæныл кафæгау
Сæртæг чызджы чыр-чыр
Уайы телтыл,
Згъоры,
Стæй сгæпп кæны
Телефоны хæтæлы хуынчъытæй
Æмæ хъыдзыгæнгæ
Смидæг вæййы
Хъæздыг хæзгулы хъусы.
Телтыл
Хуыснæгау
Йæ гуыбыны цъарыл
Фæбыры
Гæртамдæттæджы дæлгоммæ дзырд.
Козбау ныхас
Куыдзау йæ къæдзил тилгæ
Хицауы къæхты бын
Æрфæлдæхы.
Цæуы Рæстдзинад телтыл,
Æрыгон профессор
Йæ кафедрæмæ куыд фæцæуы
Кæйдæр бæстæм бырсæг
Æнæхатыр салдатау
Бырсы бардзырд.
Лæууынц телыхъæдтæ,
Сæ уæхсчытæй ивазынц телты.
Телтыл дыууæрдæм кæнынц
Пресс-бюрЪйы хъусынгæнинæгтæ.
Тас æмæ цин хæссынц адæмæн.
Телыхъæдтæ
Æппындæр
Нæ хъусынц,
Сæ уæхсчытыл сыффытгæнгæ чи тæхы,
Уыцы хабæрттæ.
Фæлæ абон!..
Æваст цæмæйдæр фестъæлфыдысты,—
Уый мæ фæдисхъæр атахт телтыл
Дæу агурæг, Рохсанæ!
Нæй дзуапп.
Чи зоны, уæхимæ нæ дæ.
Чи зоны, нæ дæ горæты дæр.
Чи зоны, никуы дæ а бæстыл.
Чи зоны, никуы дæ а дунейыл.




Автор: МАЛИЕВ Васо

Другие стихи автора