ОМАР ХАЙЯМЫ ФÆСТАГ ÆХСÆВ

Рахæсс, саурæсугъд, нозт,
Рахæсс дурыны сæн!
Уадз, æрхæндæджы стъалы
Дæ гагуыты судзæд.
Уарын
Иунæгæй тар уынгты кафы
Æгомыг хæдзæртты æхсæн,
Уарын хъавгæ æрбахойы рудзынг.
Ацыд фæндаг кæдæмдæр,
Йе кæцæйдæр æрцыд,—
Нал и уый базонæн:
Сау æхсæв бамбæхста алцы.
Чи зоны,
Искуы мæ тарф сагъæе фестдзæни цыт,
Чи зоны,
Искуы мæ тухи
Æрæджиауы хорзау
Æрттивдзæн мæ балцы.
Алæуу,
О, иучысыл алæуу сæркъулæй
Мæ хъынцъымы цур.
Хосау
Мæн искæй тæригъæд
Фыццаг хатт
Куы бахъуыди ацы къæсæрыл.
Бацыдтæн тохы хуыцæуттимæ,
Фехстон сыл арвы 'рдæм дур,
Гъе фæлæ 'рхауди фæстæмæ
Мæ сæрыл.
Рахæсс, саурæсугъд, нозт,
Рахæсс дурыны сæн.
Чи зоны,
Царды цин абон
Омары фæстаг хатт æндавы.
Ацы 'хсæв
Дунейы картæйыл
Сидзæры бахуыд æмпъузæн гæппæлау
Зыны Хорасан.
Уарын ыл
Иунæгæй
Зондцухау кафы.
Мин хуызы
Уалдзæг
Æрвоныг бæлццонау
Йæ сатæг дыргъдæтты
Дзæгæрæг — цæстыты куы худт,
Уыцы рæсугъд бонтыл
Рæстæджы хъизæмар
Уазал сæлфынæг рæдзæгъды.
Царды фæстаг зарæг
Рагон мысинагау
Хаты мæ уд
Саузым,
Æнамонд фæззæджы
Зынхъарæн цæссыгты æмдзæгъды.
Чи 'рцæуы,
Ацæуын бахъæуы искæд бон уый.
Мах размæ чи уыди,
Мах фæстæ чи уыдзæн —
Иу у сæ фæндаг.
Гъе фæлæ:
Иуы цæрæнбон
Сыгъзæрин тæбынау
Æлвисы хъысмæты æлхуый,
Иннæмæн холы — тыхтонайы карз тохы
Бассы йæ дæндаг.
Рахæсс, саурæсугъд, нозт,
Рахæсс дурыны сæн.
Ахсæв амæлын ма бауадз
Скæсæны номдзыд имамы.
Бакæ йын,
Бакæ
Кадавар зæххон цины
Абухгæ денджызы сабыр былгæрон —
Дæ цуры — хуыссæн.
Райсом
Мæ ингæнмæ
Боныцъæх, сидзæрау,
Хуры тын ризгæ æрхæсдзæн йæ армы.
Чи дæн?
Эмирты æмминас.
Философты паддзах.
Поэтты сæрдар.
Базыдтон иунæг рæстдзинад:
Джамшиды  тæбæгъæй уæлдæр у
Сæныхъæстæ дурын.
Дун-дуне ницы у,
Зæххы хъуыддæгтæн
Сæ тæрхон, сæ кæрон — мæйдар.
Искуы
Цъæх уазал æнусондзинады
Тъæппытæ фæхаудзæн Меркурий.
Гъе фæлæ
Байрагау ацахс йæ сайд барцæй
Царды рад —
Иунæг уысм,
Уарзоны ба.
паддзах. Уыдис æм, дуне æнæхъæнæй дæр кæм зыны,
ахæм тæбæгъ.
Ма бæлл æвиллон
Тыхыдзуар паддзахмæ,
Пахуымпары кадмæ,
Куырыхоны зондмæ, —
Шахы сæргæхцæй цы таугæрдæг разади,
Ууыл дæ уарзоны фарсмæ
Æдыхстæй æрбад,
Сисдзæн дæ
Къусы дзаг амонд
Зæххон хæрзты цъупмæ —
Сæрзилæн бæрзондмæ.
Рахæсс, саурæсугъд, нозт,
Рахæсс дурыны сæн.
Уадз, æрхæнджы стъалы
Дæ гагуыты судзæд.
Уарын иунæгæй тар уынгты кафы
Æгомыг хæдзæртты æхсæн,
Уарын хъавгæ æрбахойы рудзынг.




Автор: МАЛИЕВ Васо

Другие стихи автора