МÆ ФЫНЫ КÆЙ НЫФФЫСТОН, УЫЦЫ ÆМДЗÆВГÆ

Сæ иу (дыууæ сты!) — динамит,
У иннæ зынг. Цæуын сæ астæу,
Йæ бон куы зонид ахст лæг ахстау,
Уæд æм фыдбылыз дард лæууид.
Уæд æм фыдбылыз дард лæууид.

Фæлæ нæ зонын æз мæ бон,—
Мæ ахæст мæм кæсы сæрибар!
Цы бæндæнæй мæ сбастой фидар,
Æнхъæлын уый сыгъзæрин рон.
Æнхъæлын уый сыгъзæрин рон.

Æрра! (æндæр æй лæг цы схона?)
Æрра лæджы фыны хуызæн:
Цæуы уæлахиздзау хæстонау
Уацайраг йе 'рцахсджыты 'хсæн.
Уацайраг йе 'рцахсджыты 'хсæн.

Сæ иумæ бацæуин хæстæгдæр,
Фæлæ нæ бары иннæ уый.
Мæ цард — тæбын, мæ уд — æлхуый,
Æмæ йæ зилынц иумæ... знæгтæ!
Æмæ йæ зилынц иумæ... знæгтæ!

Мæн та сæ дыууæ дæр хъæуынц —
Зæрдæ дыууæ æмбисæй конд у!
Уынын: кæрæдзимæ цæуынц.
Мæ сæфт сæ фæиуы нывгонд у.
Мæ сæфт сæ фæиуы нывгонд у.

Рæмыгъд! Куыддæр фæиу уой, афтæ
Фæдæн. Фæлæ нæ кæнын хъаст:
Дыууæ бæрзонд хуры кæй тавта,
Æрмæст уый бамбардзæн мæ уарзт.
Æрмæст уый бамбардзæн мæ уарзт.

Дыууæ сылгоймаджы. Сæ астæу —
Хъысмæты фарн æмæ æлгъыст.
Мæ цард куы бабын уа мæ уарзтæй,
Æрцæудзæн уæд мæ цыртыл фыст.
Æрцæудзæн уæд мæ цыртыл фыст:

«Хуыдта Мæлæты Стыр Фæндагмæ
Мæн Уарзт — мæ амонды лымæн:
Æз цардтæн денджызы. Фæстагмæ
Йæхицæй фехста иуварс мæн.
Йæ уылæн фехста иуварс мæн.

Мæ цард мын аскъуыдта æмбисыл
Дыууæ æмхуызон хайы хыл.
Мæ уд кæсагау систон змисыл
Мæ Уарзты Стыр Денджызы был.
Мæ Уарзты Стыр Денджызы был».




Автор: МАЛИЕВ Васо

Другие стихи автора