КЪÆЛÆТДЖЫН БАНДОН ÆМÆ ХУЫМÆТÆГ БАНДОН...

Къæлæтджын Бандон
Æмæ Хуымæтæг Бандон
Фæхыл сты музейы.
Хорз æмæ, Къæлæтджынæн йæ къæлæттæ
Къухтæ нæ уыдысты,
Хорз æмæ, Хуымæтæг Бандонæн
Йæ гуырымыхъхъ хъæды лыггæгтæ
Къæхтæ нæ уыдысты,
Æндæр цытæ ' рцыдаид!
«Куыд уæндыс!..—
Загъта Къæлæтджын,—
Куыд уæндыс!
Мæгуыр лæджы Бандон!
Фæрæтæй амад!
Фырчъизийæ ныссау дæ!
Куыд уæндыс,—
Раст цыма ме 'мсæр дæ! —
Лæууын мæ фарсмæ,
Паддзахы Бандоны фарсмæ!»
Хуымæтæг Бандон дæр смæсты —
Гырымыхъхъ уыди рагæй дæр.
«Паддзахы Бандон! —
Загъта,—
Дзæгъæл гæппытæ ма кæ,
Ма рæй!
Кæд ды
Сыгъзæрин æмæ пылыстæгæй конд дæ,
Æз та хуымæтæг хъæдæй,
Уæддæр нæ кад та иу у:
Дæуыл дæр бадти Сындз,
Мæныл дæр бадти Сындз».


Автор: МАЛИЕВ Васо

Другие стихи автора