ВЕЗУВИ

Нынкъуысыд зæхх.

Фæранчы фаст хъæлæсы хъæр —

Хох,

Йæ туг — цъæх цырен уагъта,

Калд йæ дзыхæй.

Йæ туг —

Цъæх айнæг дурты тад.

Арв сыгъд

Æбуалгъ сырхзынг лæхъиры.

Тæвд æртхутæг

Зæйтæй фæстæмæ калд

Зæхмæ.

Ныгæдта,

Ныгæдта,

Ныгæдта.

Æргæвдгæ галау

Богъбогъгæнгæ

Мард горæт.

О, уыцы диссаджы галуантæ!

Дыргъдæттæ!

Сæнæфсиры цæхæрадæттæ!

Цæстытæ сæ зиллæччытæй

Сæхи тыдтой æддæмæ.

Тас.

Æвирхъау тас.

Адзал.

Везуви.

Ныр къахынц археологтæ

Мард горæты стæгдар.

Баззад æгасæй

Адæмы хъизæмар

Æмæ Аивад.

Уыди мæныл дæр

Уыцы горæты бон.

Мæ зæрдæйы стыдта

Везувийы вулкан.

Дыргъдæттæ...

Дидинджытæ...

Галуантæ...

Фæлæ нæ басыгъдысты

Сау æртхутæджы бын

Мæ маст æмæ мæ уарзт.



Автор: МАЛИЕВ Васо

Другие стихи автора