ИУНÆГ НÆУ

«...старости сопутствует одиночество»...
                                Абайты Васойы ныхæстæй
«...иунæгæй бадти».
                                 Виталийы ныхæстæй

Иунæг нæу —
Бадынц дыууæйæ.
Бадынц дыууæйæ.
Ныхас сын бацайдагъ.
Уад æмæ денджыз —
Уый дын сæ ныхас.
Сабыр мæйрухс æхсæв
Нæхи хохы —
Уый дын сæ ныхас.
Урс барæг
Урс комы
Урс бæхыл уайы,
Сау барæг
Сау комы
Сау бæхыл уайы.
Бадынц дыууæйæ —
Дыууæ хуыцауы.
Иу «нæ»-йыл ныллæууыд,
Иннæ «о»-йæ нæ хизы.
Афтæ карз у сæ ныхас,
Æмæ дуне æгасæй дæр бамыр.
Иу урс барæгмæ амоны,
Иннæ — сау барæгмæ.
Урс барæг дæр рæстæг у,
Сау барæг дæр рæстæг у.
Се стыр быцæуы
Дыууæ Хуыцауы
Срухс кодтой,
Хур мин азы размæ кæм аныгуылд,
Уыцы рагон сусæг дуне.
Иу Хуыцау хъал у
Нарты цирхъыты цæхæрæй,
Уæрæх быдыртæ,
Дæтты азæлгæ,
Налхъуыт-налмасау æрттивгæ æвзагæй,
Иннæ
Мæлæтдзаг хъæрзтæй хъæрзы
Сæ сæфты азарæй.
Урс барæг уайы,
Сау барæг уайы,
Дуне æдзынæг-æмырæй
Хъусы хуыцæутты ныхасмæ.
Карз у сæ быцæу.
Фæлæ сæ дыууæ дæр
Ставд цæссыгтæй æмхуызон кæуынц,
Хуыцауы рæстæй чи фесæфт
Æртын æвдæм азы,
Уыцы æмбæлттыл.
Иунæг нæу —
Бадынц дыууæйæ:
Иу — Абайты Васо,
Иннæ — йæ Иунæгдзинад.




Автор: МАЛИЕВ Васо

Другие стихи автора