ЦÆР, МÆ ИР!

Цæр, мæ Ир! Дæ фыдгулты фыддæрадæн
Фест æвдудон. Аныхъуыр дæ цæссыг.
Сие дæ саутæ– бафæраз, æндæра дæ,
Зонын æй, дæ рыст зæрдæ нæ хæссы.
Де знæгтимæ уæд йæ дзырддаг де знагæн,
Уæдæ 'нæ знаг дуне дæр нæма уыд.
Фæлæ знагыл æлгь куы кæнай йе 'лгьагæй –
Де знагæн дæр ахæм знаг ма уæд!
Тонынц дын фæйнæрдыгæй дæ арæнтæ –
Кæд фæуиккой, афтæ нæу, фæрстæ тынд –
Чи дын арц ныццарæзта дæ артæнтæм,
Чи дæм хъавы гадзайау фæстæты.
Ма æрхау дæ тыхет удæй дæ уæрджытыл,
Ма у де стырзæрдæйæ æдзæттæ –
Иу хæрæг дыл хиздзæни йæ хæрджыты,
Иу куыдз дыл скæндзæни куыдздæттæ...
Оххай, цард хæдзархастау фæхастæуы, –
Ацы сылваз демократи, ацы! –
Зылын чи у, уыцы лæджы раст кæны,
Раст лæджы рæстæй цæрын нæ уадзы.
Ды цы зынтæн фæразыс, цы рыстытæн! –
Фæстагæттæ дæ хæедзысты дисæн.
Дæу сыгъдæгуд скæндзысты Чырыстийау,
Де знæгтыл та бакæндзысты 'вдисæн.
 
Дунейыл мын иунæг дзуарау иунæг дæ, –
Уæд дæ сахъ цæдисонтæ кæм сты?!
Тугхъæдгæмттæй чи фæцыди ингæнмæ,
Уыдон дыл хæрзаудæн кæндзысты.
Æмæ д' арт куы сгуыпп кæна дæ артдзæсты,
Й'алыварс дæ фæлмæст цот куы сиу уой,
Уæд мæныл æрзайдзæни цыппар цæсты, –
Хъуамæ дын дæ цинтæ фенон иууыл.





Ноябрь, 1991
 

Автор: ХУГАЕВ Сергей