ХУРЫ РÆГЪ

Бадæм изæрсарæй дзаг фынгыл,
Сидтытæ уадзæм – æгъдау.
Сау бæгæныйы сау фынкæй
Къухтæ 'ндæдзынц мыдау.
Минас – йæ зæрдæ кæмæн зæгъы! –
Иунæг дзы маргьы 'хсыр нæй.
Чъиритæ урс-урсид тæбæгьы,
Цыма сæ 'рзылди зырнæй.
Уæдæ фыдызгъæлæй, халсарæй, –
О Хуыцау, фысымтæн радт!
Бадты куыд хистæрæй базарæм,
Æмæ сфидауы бадт.
Зарæг нæма 'рсысы цары бын,
Æмæ та – адджын ныхас.
— Иу фæлмæн къæвда ма, арæбын...
— Елиа йæ рауадзæд, уас!
— Быдыры иу амонд – донхорыг,
Арвмæ ма чи кæсы ныр?
— Раст зæгъыс,
Фарон нæ нартхорæн
Стыр æххуыс фæци,
Стыр.
Дзурынц фæйнæрдыгæй. Дзуринаг –
Цас хъæуы, уымæй фылдæр.
Бæгæны дæр та дурынæй
Къусмæ фынккалгæ – сæр-сæр...
— Иу ран та сарæзтой ГЭС, æмæ
Кусдзæни хуры тæвдæй.
— Гъа-гъа-гъа, диссæгтæ, ме Скæнæг,
Диссаг дæр нал и уæвгæ!..
Иу лæг – йæ фындзыхъæл азылын
Кæсæнцæстыты уæзæй,
Тенкайыл иу æрду нал зыны –
Тенкайыл рацыди зæй.
Уыцы лæг сыстади, хистæртæм
Бадзырдта – уалæ кæдæм!
– Дзурæм кæрæдзийæн истытæ,
Рæстæг цыбыртæ кæнæм.
Хуры кой ракодтат. Хуры цæст
Бацъынд уьдзæни – хæрз цъынд.
Сусæны мæйы дæр курдзысты
Адæм кæрæдзийæ зынг.
Хуры хъарм бонтæ нымад ысты, –
Лæг дын ныййиттæг, ныссих, –
Хъазгæ нæ кæнын, мæ мадыстæн, –
Цъенгæ их фестдзæн – хæрз их.
Лæджы æнæзæрдæ ныхæстæй
Барызти зæрдæ куыддæр.
Ацы хуыцауысконд сыхбæстæ,
Тæр барынц лæгæн, æгæр.
Фестадтæн, цæстытæ ахастон
Куывдыл, ныссабыр и куывд.
Уыцы гуыбырфындз лæг мах астæу
Хурæй куыдтæ дзуры, куьд?.
– Хорз лæг, дæ хорзæхæй, мауал дзур! –
Фынгæн тъæпæн къухæй – тъæпп. –
Хистæртæ, хуры рæгъ рауадзут, –
Макуы йыл абада тæпп!
Лæг мæм æрбазылди, схæцыди
Кæсæнцæстытыл уæлдæр,
Ома, дам, алæма кæцы дæ,
Ома, дам, дзурыс æгæр.
Гъестæй мæ комкоммæ бафарста:
— Лæппу, цæуыл у дæ хыл?
— Уæдæ дæ цæст та куыд бауарзта
Рухс хурæй афтæ зæгъын?!
Банцай, дæ хорзæхæй, мауал дзур,
Кæнæ та 'ндæр исты дзур.
Хистæртæ, хуры рæгь рауадзут,
Худа нæм алыбон хур!

Мартъи, 1977
 



 

Автор: ХУГАЕВ Сергей