МÆ РУХС ИЗÆР

Мигътæй арвгæрон нæ зынди,
Худти стъалы арв' астæу.
Рацыд, рацыд, гъæтт мæ зынгыл,
Уымæ чи нæ бакасти!
Уайгæ-райгæ сисгæрæтты
Уыцы 'взыгъд дыууæ зæнгæй.
Рис-бæллицтæ – рисгæ рæтты,
Цин-къахдзæфтæ – уæзæгыл...
Тæрттыл ахæцыди –
Тæрттæ
Судзынц къæхты тагьд истæй.
Æмæ цыма рагьы дзуæрттæ
Се 'мбæхст цинтæ равдыстой.
Уас мæ сыгъдæг кувинæгтæ
Барст фæуой сæ бардуагæн.
Ныр нæ сыхы иннæ лæгтæм
Æз куыд дзурон ардыгæй?!
Уæнгты фезмæлд, зæнгты фетынг –
Къах нæ хæцы се 'ркъуырццыл!
Ахæм диссаг никуы федтон,
Ахæм рацыд никуы 'рцыд.
Сæры гоппыл худы бæсты
Морæ халбыд – иувæхсыг.
Скæн дæхицæн удыбæстæ -
Рацу, ра, мæ иувæрсты.
 
Иунæг фæкаст цас диссаг у,
Цас диссаг у иу ныхас?
Рагьы дзуæрттæ, а риссаг уд
Ма бакæнут зинты хай!
Уынджы 'ндæр ызмæлæг нал и, –
Къæхты хъæрмæ байгомыг.
Къух быгъдæг тæрттæм æвналы, –
Тæрттæ 'хгæнын нал комынц.
Тæрттæ улæфынц æддæмæ, –
Цыма раст зæйуат уыди,
Стæй дзы зæй æрцыди æмæ...
Æмæ хуртæ ратылди!
Дуне байдзаг цинæй, хъармæй.
Дуне 'гасæй аргьуан уыд.
Ехх, цы изæр федтон!
Хъуамæ
Ма басудзид, ма 'рхауид!




Июль, 1987
 

Автор: ХУГАЕВ Сергей