УÆД ÆРГЪÆВТОН ХЪУЫДДÆГТÆ ФÆСТÆДÆРМÆ...

Уæд æргъæвтон хъуыддæгтæ фæстæдæрмæ,
'Нæнцой фæуа ме 'нæрхъуыды уастæн!
Абонæй знон уыдтæн кæстæр æмæ
Ме 'гæнонмæ зноны цæстæй кастæн.

Амæ мæнæ февналдзынæн, уымæ та
Иубон куы уа, иу дзæбæх бон – гьеуæд.
Уаддзалх кодтон арвыбын æнæ мæтæй, –
Ехх, уæд-иу мæ хæйрæджыхай феуæгьд.

Уыцы уæлвæз! Нæй зæххыл хуыздæр уæзæг,
Æммыст иу тыргьджын хæдзар дзы 'рцараз.
Кæс 'мæ та дæ дуæртты изæрырдæм
Донмæ дунейы чындздзон чызг рараст.

Уддзæф уыцы 'гæлтæг-мæлтæг абады
Чызджы уæхскыл, алæсы йæ тары.
Уым ын йе 'мбæхст къуыппытæ сгары,
Æмæ сысты 'нæрхъæц пæр-пæр къабайыл.

Ме 'нæсхъæр уарзт! Уæ мæ сау зынг бахуысса, –
Баззад, дам-иу талынгмилтæм тыргьы.
Уæд æз та – куыд нæ мын уыди æххосаг! –
Искуы уынджы схæцьщтæн дыгъ-дыгъыл.

Хуры хъæрммæ 'ртæхдзастæй куыд райхæла
Æрыскъæфджын цъæх æрдузы уарди, –
А дунейыл ахæм зæрдæ, ахæм уд
Иу зæххон ызмæлæгæн нæма уыд.
 
Мæнæ иубон, хур куыддæр æрныгуыла
Афтæ, кæд нæ рафæлдæха бæстæ...
Стæй та бонты дегуыла-дыгз'ылайы
Æз дыууæрдæм риуæмбæрц лæгæрстон.

Мæнæ гьеныр бамбырд кæнон ме 'мбæлтты
Æмæ иумæ иу изæр фæбадæм.
Фæлæ та-иу фыдбылызыл фембæлдтæн
Æмæ та-иу хæйрæджы хай бадæн.

Хиуæтты дæр асгарын бæргæ хъæуы,
Рынчынтæн хуымилиæгтæ алхæн.
Уыцы стыр æддæгуæлæ нæргæ хъæуы,
Хионæй-хæстæгæй цас уыд махæн!

Фæлæ нæй! Мæ ныхыфыст, æвæццæгæн,
Афтæ уыди: абон-асом-абон...
Æмæ мæнæ никуыдæм фæхæццæ дæн,
Æмæ мæнæ никуы ссардтон амонд.




Декабрь, 2006
 

Автор: ХУГАЕВ Сергей