БИРÆ ХЪÆУЫ...

Цард цæуы нæргæ æмæ æмырæй.
Уарзт дæр афтæ, - баззайы нæ сæнтты,
Нарст цæсгом æрбампылы, фæндырау,
'Рæнцайы адзалы уæз нæ уæнгтыл...
Уый нæ тæрсы амæлынæй царды,
Чи байуæрста адæмыл йæ хæрзтæ,
Чи не 'вæрдта искæй хъысмæт кардыл,
Рухс сомбонæн чи радта йæ зæрдæ.
Чи нæ кодта уарзоны æнамонд,
Чи нæ уыд фыдзæрдæ æмæ хингуырд,
Мад 'мæ фыд кæмæй уыдысты райгонд,
Адæмы æдзух æххуысæн чи хъуыд.
Чи рысти йæ бæстæйыл, йæ зæххыл,
Чи йын уыдис хъахъхъæнæг, салдатау,
Чи йын уыдис... Дарддæр ма цы зæгъон?
Чи басыгъдис, иу дзырдæй, цырагъау...
Бирæ хъæуы а дунейыл хорзæн, -
Айхъуыса дæ кады хъуыддаг дардыл;
Бирæ хъæуы - кувой дын дæ зондæн,
Макуы тæрсай амæлынæй царды...
 



Автор: ГАЛАВАНОВА Людмила