СИМД

У махæн Симд нæ адæмы истори,
У махæн Симд цыкурайы фæрдыг.
Æрхастой йæ гуыппырсартæ - æндонриу, -
Нæ аивады 'нæкæлгæ мæсыг.
У скифтæ 'мæ аланты балцы кадæг,
Нæ хæхбæсты суадæтты сыр-сыр,
Нæхи Къостайы уддзырвæй фыст зарæг,
Нæ чызджыты сæдæмырон фæндыр.
Уый - номарæн Гæздæнты авд зынгхуыстæн.
Балойы богъ, Иссæйы карды 'рттывд.
Цыма нæ хæхтæм 'гас дуне ныхъхъуыста,
Цыма йæ цæссыг цъитийæн æртылд...
Нæртон Симд ис нæ дард хæтæнты немæ,
Нæртон Симд у хъазуат куысты уынæр.
Нæ аивады минæвар дунемæ,
Нæ зæрдæты æнæртхутæг цæхæр!..
Мæ Ирыстон, мæ уды цин, мæ риссаг,
Ды сфæлдыстай дæ уды цырвæй Симд,
Цæмæй ысуа уый 'гас дунейæн диссаг,
Цæмæй ысуа уый денджызтыл нæ хид!
 




Автор: ГАЛАВАНОВА Людмила