НЫСТУАН НÆ ФÆСИВÆДМÆ

Сымахимæ, нæ ныфсдарæн кæстæртæ,
Мæн аныхас зæрдиагæй фæнды.
Кæрæдзимæ куыд æлвасут уæ кæрдтæ,
Цæмæн цæут эмоциты фæдыл?

Нæ мадæлтæн æгъгъæд кæлы сæ цæссыг,
Нæ фыдæлтæн иронвæндаг - æгъгъæд.
Æнæуый дæр æнус-æнус нæ мæсыг
Йæхи дурæй гæзæмæты нæ калд.

Ивылд æрсдонау æфсæрстат фæдисы,
Нæ уæзæгмæ куы лæбурдта фыдгул.
Чъреба, Карца, Тлиахъана, Присы…
Уæ ирон туг ирон зæххыл ыскул…

Кæдæй-уæдæй ма равдыста йæ рухс тын
Аланты уаз, фæндагамон байрах.
Уый афтæ рæсугъд фидыдта уæ къухы, -
Нæхиуыл-иу дзуæрттæ ‘фтыдтам мах.

Æмæ ныхъхъæр и Теркæй-Туркмæ
Уæ хорзы кой, тæхгæ цæргæс - уæ ном.
Лæджы фыртæй уæм не ‘рхаудаид мур къæм,
Поэт уæ схуыдта зарæджы нæртон.

Ныр та кæйдæрты ‘нæгъдау миты азар
Сымах дæр судзы, абады уыл къæм.
Кæны хуыснæг йæ цауд намысæй базар,
Йæ фæдтæ йын кæм нæ фендзынæ, кæм?!

Æмæ фыдгул йæ къах æркъуыры цинæй,
Уæ иу куы сисы иннæмæ йæ къух.
Кæйдæр фыдвæнд, кæйдæр æнаккаг хинæй
Æбыхсæн уавæр не ‘хсæн ис æдзух.

Æмæ ма уый дæр фод цыфæнды! Мадæн
Уæззау дæр у йæ саудалынг фæлыст.
Дæ æнгуылдзтæй кæцыфæнды дæр ракæн, -
Уæлдай сæ нæй, - æмхуызон у сæ рыст.

Æмæ кæнынц нæ фæдисонтæ къаддæр,
Нæ уæлмæрдтæ - сæвджындæр æмæ… Охх!
Æфсургъæй хизы хæрæгмæ нæ кад дæр,
Тæрсын, куы фæуа дзæгъæлы нæ тох!..

Тæрсын!.. Нæ фæндзæм скъолайы кæрты
Цы лæппуты ныхъхъæбыс кодта мæр, -
Куы ныл фæхуда уыдонæн сæ зæрдæ, -
Мæрдтæм дæр хъуысы худинаджы хъæр…

Æмбарын æй: дзыллæйы гакк у рагæй
Куы фæцуды æхсæны фæтк, æгъдау, -
Хатт фыртыхстæй кæрæдзимæ дæндагæй
Дæр бавналынц, æнæхсæвæр бæхтау.

Æмбарын æй: уæ зæрдæтæ уæ риуы
Гуызавæйы кæлæн-къæппæджы ахст.
Тæдзынæгæй цыхцыры бынмæ чи лыгъд,
Æркодта ныл æуый æмбисонд раст.

Уæддæр уæм сидын: бамбарæм кæрæдзи,
Тыхсты дæр уæм хъæрмуд æмæ фæрныг.
Зæгъинагæй, быцæуагæй кæмæ ц’и, -
Кæнæм-иу æй сабыр æгъдауæй лыг.

Нæ дуг ысхъызыд, ихы сæрыл джиуæм,
Нæ къух - цыбыр, нæ масты рæхыс - даргъ.
Æниу кæд абон, донзоныгау чиуæм, -
Нысайнагау уæддæр дæ зæрдыл дар:

Байрах нæ сæрмæ иугæр систам уазæй,
Нысанмæ йæ фæхæссын хъуыди уæд.
Йæ урс æфсургъыл Уастырджи нæ разæй
Фæраст уаид рæхджы заманы кæд!..

15. 6. 93 аз.


Автор: ХЪОДАЛАТЫ Герсан