ДУДАЙТЫ МАРИКЫ МОНОЛОГ

Æрцыд æнагъæддаджы дуг,
Гуырдзиаг абырджыты 'рдонгтæ
Сыгътой нæ хъæуты…Калдис туг,
Нæ уагътой гал, нæ уагътой хъуг,
Æрвыста Арцеу дæр фыдбонтæ.

Уыдис уæззау рынчын мæ фыд,
Хуыссыди сынтæджы, хъæрзыдта.
Хъысмæтæй никæд уыд рæвдыд,
Ныр дæр уынгæг сагъæсты цыд,
Цы фыдбылыз æм каст, - нæ зыдта.

Фæзынд æм туггоппæй æзнаг,
Йæ хъавд уыд: амара йæ хурхæй.
Æниу æм уый нæ фæкаст фаг
Æмæ йыл гас ведрæйы дзаг
Фæкъул æхсидгæ дон йæ къухтæй.

Уæддæр нæ басастис сæ монц
Фыдбылызджын мæнгард сæлхæртæн.
Æмгæрон сæм нæ цыд фæсмон,
Ыскарз и ноджыдæр сæ хъонц, -
Нæ хæдзар радтой нын цъæх артæн…

Цæй, ацу, ахæмтæн ныббар! -
Уæд ма цæй ирон гуырд уыдаин?
Æмæ мыл ахæстоны тар
Фæдардта уал азы йæ бар,
Мæн кодта карз хъизæмар тайын…

Уæхсчы сæрты мæм уыд сæ каст
Хæрамæй дзаг цæстытæн зулмæ.
Мæ хъуын сæ карз фидистæй саст,
Æнæад мын уыди сæ кас,
Сæ адджын цай æмæ сæ дзул дæр.

Мæн иу фарст агайдта æдзух:
Цæй тыххæй ауал азы дæргъы
Мæн кодта сау хъизæмар хурх,
Цæмæн мыл систа цин йæ къух,
Цæмæн мæ сонт зæрдæ уынæргъы?

Кæд æз мæ мæгуыр фыды туг
Кæй райстон фырмæстæй æмбойны,
Æуый уæззау фыдракæнд у, -
Мæнæй уый, саугуырмæй фæцу!.. -
Сæхицæн та - нæ тугæй дойны…

Дыууын азы мын уыд лæвæрд
Сæ талынг ныккæнды фæбадын,
Фæрсхъæд кæнын зымæг уа, сæрд,
Æнаххосæй - ыссæст, æфхæрд…
Уæддæр мæ сæрыстыр нæ бабын.

Куы-иу дæ федтон фыны æз,
Мæ рагфыдæлты уæзæг Бихъар, -
Мæ хъалы мын уыдис фæрæз,
Мæ ныфс, бæласау, хаста рæз,
Æрттывта тохмæсидæг цирхъау!..

Æниу мæ арæх хъуыстис «Охх!»,
Фæлæ сæ цæрæнбонтæ бирæ,
Мæн чидæрид нæ кодта рох,
Мæ сæрыл чи расидтис тох,
Кæй фæрцы фæчъил сау лæг-бирæгъ,

Кæдæй-уæдæй ма федтон: хур
Ирыстоны цъæх арвæй худы.
Нæ, уый мæ салд зæрдæйы цур,
Йæ сæнтты чи хæтыд зынггур,
Æрфысым - тавынæн мæ уды…

Ныр æз мæ риуы 'мбæрц цæуын,
Мæ Ир, дæ фæрныг зæххыл абон,
Мæ удæй цины арт цæгъдын,
Фæстейæ баззади фыдфын, -
Тæргай мæм нал уыдзæнис амонд.

Сентябрь, 2013 аз.



Автор: ХЪОДАЛАТЫ Герсан