МÆ КЪÆХТÆ МÆ ХÆССЫНЦ ДÆ ЦУРМÆ...

Мæ къæхтæ мæ хæссынц дæ цурмæ,
Мæ къухтæ дæм сæхи ивазынц.
Фæлæ кæд уыд æвналæн хурмæ,
Кæнæ зæгъын æргомæй «уарзын»?

Мæ цæстытæ дæ уæгъд нæ уадзынц,
Цыма сын раст архъанæй ахст дæ.
Мæ зæрдæ дыл йæхи æндзары,
Æз та дæуæй «сыбырмæ» хаст дæн.

Æмæ тыхсы мæ уд, дзыназы…
Цыма гæды - мысты лæппынæй, -
Фыдуаг хъысмæт дзы, райгæ, хъазы,
Нæ йæ уадзы кæсын йæ бынæй…




Автор: ХЪОДАЛАТЫ Герсан