ЦЫППАРРÆНХЪОНТÆ

* * *
Цæйнæфæлтау æз хайджын уон дæ кадæй,
Дæуау æдзух цæстмæмитæ кæнон,
Фæлтау мæхи ныррæхойдзынæн кардæй,
Дæлимонтимæ авддæлдзæхх фæуон!
* * *
Агурыс зæххыл æрмæст æвзæртæ,
Хорздзинад дæ цæстытæн сындз у.
Гъе, уæууа, куыд мæгуыр у дæ зæрдæ! –
Калы дын, гæбæр сæгъау, йæ фист.

* * *
Хъæрмуд ныхас йæ цæст зæгъын нæ уарзы,
Лæджы фыртæн, нæ йæ нымайы уазыл.
Æниу куыд зæгъа, кæд нæ зоны уарзын,
Кæд у йæ зæрдæ ихы къæрттау, уазал?..

* * *
Цæрæнбонты кæйдæр фæдыл фæцыдис,
Нæ алæвæрдта къахвæндаг йæхицæн.
Ныр цъиунымайæн бур фæззæг куы ‘рцыдис
Уæд ын – нæдæр хæзна, нæдæр къæбиц нæй.

* * *
Хъуынамбыд цад. Йæ сæр дзы сдардта хæфс,
Æз дæр, дам, фидын зарынæй мæ хæс.
О булæмæргъ, æрыхъус æм, æркæс,
Дæхи æрдзон симфонимæ ирхæфс.

* * *
Тæхудиаг у уыцы лæг, кæцы
Рæстдзинадыл æнувыдæй хæцы.
Куы бахъæуа – йæ туджы дæр мæцы,
Зын уавæрыл кæмдæриддæр хъæцы.




Автор: ХЪОДАЛАТЫ Герсан