ФÆСТАГ РÆСТÆДЖЫ МЫН ЦЫДÆР...

Фæстаг рæстæджы мын цыдæр
Нæ кæны фаг.
Мæ зæрдæ схивæнд ис æгæр, –
Хъæрзаг, тæлфаг.

Цыдæргъуызон æхгæны хъуыр,
Уынгæг тыхсын.
Кæдæй ацырдæм нал у ныр
Мæ бон быхсын.

Мыды гуыл мын нæ кæны ад.
Чыргъæдæй ист.
Чындзæхсæв. Тасы фынг. Бæркад…
Цыма у хист.

Æгæрмæгуыр нæ пецы дæр
Нæ тавы зынг.
Æрыхснырсын, зæгъынц мын «цæр»! –
Кæсы мæм хъыг.

Фæцæуон, цæй, дæсныфæрсæг, –
Ысхин мын чынд.
Æндæра мыл æхсæв хуыссæг
Куыд нал хæцы?

Цы уа йæ цырв мæ карз тыхстæн? –
Мæ уарзон хъæу,
Кæд та мыййаг зæрдæрыстæй
Кæй мысын дæу?

Март, 2013 аз.




Автор: ХЪОДАЛАТЫ Герсан