МА КÆ, ЦЪИУ-ЛÆППЫН, АХСТОНÆЙ МА ’РХАУ...

Ма кæ, цъиу-лæппын, ахстонæй ма ’рхау 
Æмæ зæххыл дæ тыбыртæ ма сцæгъд. 
Байрæз, акæн уал иу пæррæст, маргъау, 
Иунæг хатт уал дæ уадындзæй ацæгъд!.. 
Ма кæ, сау бадай, хауынвæнд ма скæ, 
Мад тæригъæд у, сагъæстæй дзаг у, — 
Ног та цъус раздæр атахт бындзагур, — 
Тагъд фæзындзæн æд хæринаг, уасгæ. 
Æмæ, де ’мдзæрин фаззон лæппынтау, 
Ды куы нæ сдарай уымæ дæ бур дзых, 
Уæд йæ базырты нал уыдзæн мур тых, 
Нал базондзæни зарын æппындæр... 
«Цъипп-цъипп...» — къутæртæй д’ агургæ уасдзæн. 
«Цъипп-цъипп...» — бæласы цонгæй кæудзæни. 
«Цъипп-цъипп...» — æмбонды михæй дзыназдзæн. 
«Цъипп-цъипп...» — иудадзыг марой кæндзæни. 
’Хсæв дæр, райсом дæр, бон дæр, изæр дæр, 
Æмæ рисдзæн мæнæн дæр мæ зæрдæ. 
...Афтæ хатыдтæн цъиуы лæппынмæ, 
Фæлæ мады мæгуыр зæрдæ скъахта. 
Федтон: рахауди бæласы бынмæ 
Æмæ зæххыл йæ тыбыртæ цагъта... 


1967 




Автор: ХЪОДАЛАТЫ Герсан