ЗЫНГБАЗЫР БÆЛЛИЦТÆ...

Зынгбазыр бæллицтæ... Мæ зæрдæ та схур и, 
Хъыджы сагъæс ахылди, мигъау, мæ риуæй. 
Дæ ном дын тæрсгæйæ мæхимид куы сдзурын, 
Уæд акæсын дунемæ урссæр Хъæриуæй. 
Æнæрхъæц бæллицтæ... Кæдæмдæр мæ хонынц, 
Хæцынц мын мæ цонгыл, цыма дæн сывæллон. 
Дыууæ сау æрфыджы... Сынтытау мæ тонынц, 
Дыууæ æрвгъуыз цæсты... Ыскодтой мæ ’вæлмон. 
Кæцæй та мæм касти, кæ, ацы фыдадзал? 
Куыд та феуæгъд ысты мæ зæрдæйы рохтæ? 
Æз афтæ куы ’нхъæлдтон: чъырын арт æруазал, 
Æз афтæ куы ’нхъæлдтон: тæлтæг уарзтæй рох дæн! 
Сызгъæрин бæллицтæ... Сызгъæрин фæрдгуытæ 
Ызмæлынц, æрттивынц мызул-мызул халæй... 
Бындары рæсугъд чызг, сæ кæнæг ды куы дæ, 
Уæд ма сæ дæ цæсгом куыд бахъæцы халын? 
Цы загъдæуа? Басур йæ бырынкъ мæ сисæн... 
Уый атахт мæ рæзты дæ рухс фæлгонц, маргъау. 
Нæй зæрдæйæн алы уæздан къухтæм исæн... 
Мæ лæппу мæм хаты: «Цæй, ракæн мын аргъау...» 
Фæу ды рæствæндаг! Мæн арв дæр ныццæвæд, 
Ныххурх та кæндзынæн мæ зæрдæйы ’рра монц... 
Æрмæст дыл мæ цæстæн йæ иу тигъ ныдзæвæд, 
Æмæ мыл тындздзæнис йæ рухс базыр амонд! 





Автор: ХЪОДАЛАТЫ Герсан