ЗÆРДÆХСАЙД

Афонмæ кæм фæтæхынц Африкæмæ бардзæй 
Ам — цъыкк, уым — цъыкгæнджытæ, табуйаг 
мæргъзæдтæ? 
Зонын æз: сæ зын фæндаг удыбæстæ ссардзæн, 
Гъе уæддæр сæм, сау бада, ахсайдта мæ зæрдæ: 
Чи зоны сыл хурæнхъæл искуы их ныууарыд, 
Чи дзы баци базырсаст, чи — цæсткъахтæй 
бакуырм; 
Чи зоны сæ карз æнтæф хухулæгæй мары, 
Науæд та фырхуылыдзæй сыстади сæ пакъуы. 
Чи зоны сæ зилгæуад арвы къуымтæм систа, 
Удаистæй тар мигъты агурынц сæ фæндаг; 
Ацагъта дзы хъæрццыгъа искæмæн йæ систæ, 
Хин рувас дзы искæмæй асхъаудта йæ дæндаг. 
Чи зоны, хъызт денджызы науы телтыл бадынц, 
Фестъæлфынц сæ мидвыны уылæнты цæлхъытæм; 
Оххай, уым сæ иуæн дæр нал цæгъды йæ уадындз, 
Нал дзы ’нтысы иуæй дæр зарæджы рæнхъытæ... 
Афонмæ кæм фæтæхынц, афонмæ кæм ысты? 
Бафтыдысты урс хæхтæм, йе — цъæхвæлыст фæзтæм? 
Ме ’нæрцæф уæзæгонтæ, ехх, куыд тынг уæ мысын, 
Афтæмæй та уыцы бон н’ акастæн уæ фæстæ. 
Афтæмæй та уыцы бон «хорзæй...» дæр нæ загътат, 
Атахтыстут сусæгæй райсомы фæцъæхтыл. 
Сырддонцъиутæн у* ахстæттæ гомдуарæй ныууагътат, 
Чичири-дзæнгæдатæ уырдыгæй фæцæгъдынц... 


1983 






Автор: ХЪОДАЛАТЫ Герсан